اسلام آباد: وفاقي اطلاعات ۽ نشريات واري وزير عطا تارڙ چيو آهي ته پاڪستان لاءِ پاڻي رڳو هڪ قدرتي وسيلو نه، پر بقا جو معاملو آهي، ۽ پاڪستان هر حال ۾ سنڌ طاس معاهدي جي تقدس ۽ تحفظ کي يقيني بڻائيندو.
سنڌ طاس معاهدي بابت منعقد ٿيل هڪ بين الاقوامي سيمينار کي خطاب ڪندي عطا تارڙ چيو ته بحث صرف هڪ معاهدي جو نه، پر پاڪستان جي 24 ڪروڙ عوام جي زندگيءَ سان لاڳاپيل آهي. هن چيو ته درياءِ سنڌ صدين کان دنيا جي قديم ترين تهذيبن مان هڪ کي پاڻي فراهم ڪندو رهيو آهي ۽ پاڪستان جي تاريخ به درياءِ سنڌ سان گهري وابستگي رکي ٿي.
وفاقي وزير چيو ته پاڪستان جي معيشت جو بنيادي دارومدار زراعت تي آهي، جڏهن ته درياءِ سنڌ ان شعبي جي حياتيءَ جي رڳ جي حيثيت رکي ٿو. سندس چوڻ هو ته لڳ ڀڳ ڇهه ڏهاڪا اڳ ٻن ملڪن هڪ غيرمعمولي فيصلو ڪندي سنڌ طاس معاهدو ڪيو، جيڪو دنيا جي پائيدار آبي معاهدن مان هڪ سمجهيو وڃي ٿو.
عطا تارڙ وڌيڪ چيو ته پاڪستان هميشه پرامن لاڳاپن، تعميري ڳالهين ۽ معاهدي تي ايمانداري سان عملدرآمد جو مظاهرو ڪيو آهي. هن چيو ته 1960ع جو سنڌ طاس معاهدو بين الاقوامي لاڳاپن ۾ هڪ منفرد حيثيت رکي ٿو ۽ ان جي اهميت عالمي سطح تي مڃيل آهي.
هن زور ڀريو ته پاڪستان ڪيترائي ڀيرا واضح ڪري چڪو آهي ته ملڪ جي عوام کي درياءِ سنڌ جي پاڻي تي مڪمل حق حاصل آهي. جيڪڏهن پاڻي روڪڻ جي ڪا به ڪوشش ڪئي وئي ته قومي قيادت ان جو مؤثر جواب ڏيڻ لاءِ پرعزم آهي.
وفاقي وزير چيو ته پاڪستان جو عزم آهي ته سنڌ طاس معاهدو هر صورت برقرار رهندو، ڇاڪاڻ ته پاڻي کي هٿيار طور استعمال ڪرڻ علائقائي ۽ عالمي امن ۽ استحڪام لاءِ نقصانڪار آهي.
عطا تارڙ جو چوڻ هو ته گڏيل رضامندي سان وجود ۾ آيل معاهدي ۾ ڪا به تبديلي به صرف ٻنهي ڌرين جي اتفاق راءِ سان ئي ممڪن ٿي سگهي ٿي، تنهن ڪري ڪنهن به قسم جي هڪطرفي قدم جي گنجائش موجود ناهي.
هن وڌيڪ چيو ته سنڌ طاس معاهدي جي هڪطرفي معطلي واري ڪوشش سبب ڀارت کي عالمي فورمن تي تنقيد ۽ شرمندگي کي منهن ڏيڻو پيو. سندس چوڻ هو ته پاڻي کي تڪرار جو سبب بڻائڻ بدران، علائقائي تعاون، امن ۽ گڏيل ترقي جو ذريعو بڻائڻ گهرجي.
وفاقي وزير آخر ۾ زور ڏنو ته پاڪستان بين الاقوامي قانون ۽ معاهدن جي پاسداري تي يقين رکي ٿو ۽ مستقبل ۾ به سنڌ طاس معاهدي جي تحفظ لاءِ سفارتي ۽ قانوني سطح تي پنهنجون ڪوششون جاري رکندو.
