لاهور: پنجاب جي وڏي وزير مريم نواز ايندڙ پنجن سالن دوران صوبي ۾ 5 هزار اليڪٽرڪ بسون روڊن تي آڻڻ ۽ شاگردن کي وڏي پيماني تي اي بائيڪس فراهم ڪرڻ جو اعلان ڪيو آهي.
وڏي وزير جي صدارت هيٺ ٽرانسپورٽ ۽ ماس ٽرانزٽ کاتي جو اجلاس ٿيو، جنهن ۾ صوبي ۾ وڌيڪ اليڪٽرڪ بسون، اي ٽيڪسيون، اي بائيڪس ۽ اي ٿري ويلرز متعارف ڪرائڻ بابت اهم فيصلا ڪيا ويا.
اجلاس کي خطاب ڪندي مريم نواز چيو ته ايندڙ پنجن سالن دوران پنجاب جي عوام کي جديد، ماحول دوست ۽ سستي سفري سهولتون فراهم ڪرڻ لاءِ 5 هزار اليڪٽرڪ بسون مختلف شهرن جي روڊن تي هلنديون.
هن چيو ته پنجاب حڪومت رڳو اليڪٽرڪ بسون خريد ڪرڻ تائين محدود ناهي، پر صوبي ۾ انهن جي تياري (مينوفيڪچرنگ) جي صنعت به قائم ڪري رهي آهي، جنهن سان روزگار جا نوان موقعا پيدا ٿيندا ۽ مقامي صنعت کي هٿي ملندي.
اجلاس دوران بريفنگ ۾ ٻڌايو ويو ته پنجاب ۾ اليڪٽرڪ بسن جو اسمبلنگ پلانٽ باقاعده طور ڪم شروع ڪري چڪو آهي، جيڪو مستقبل ۾ صوبي جي ٽرانسپورٽ نظام کي جديد بڻائڻ ۾ اهم ڪردار ادا ڪندو.
بريفنگ موجب، پنجاب حڪومت ايندڙ هڪ سال دوران هڪ لک شاگردن کي اي بائيڪس فراهم ڪندي، جڏهن ته هر اي بائيڪ تي 70 هزار رپين جي سبسڊي پڻ ڏني ويندي، جيئن شاگردن لاءِ سفري خرچ گهٽجي سگهن.
اجلاس کي وڌيڪ ٻڌايو ويو ته شاگردياڻين لاءِ اي بائيڪ جي ڊائون پيمينٽ ۽ رجسٽريشن فيس وڏي وزير مريم نواز ذاتي طور ادا ڪندي، جنهن جو مقصد تعليم حاصل ڪندڙ ڇوڪرين کي وڌيڪ سهولتون فراهم ڪرڻ ۽ انهن جي محفوظ آمدرفت کي يقيني بڻائڻ آهي.
بريفنگ دوران اهو پڻ ٻڌايو ويو ته پنجاب حڪومت جا سرڪاري ملازم به آسان قسطن تي اي بائيڪس حاصل ڪري سگهندا، جنهن سان ماحول دوست ٽرانسپورٽ جي استعمال کي هٿي ملندي.
اجلاس ۾ وڏي وزير تعميراتي منصوبن بابت پڻ هدايتون جاري ڪندي چيو ته ترقياتي ڪمن دوران حفاظتي قدمن تي سختي سان عملدرآمد يقيني بڻايو وڃي، جيئن مزدورن ۽ عام شهرين جي جان ۽ مال جي حفاظت کي هر صورت ۾ يقيني بڻائي سگهجي.
پنجاب حڪومت موجب، اليڪٽرڪ ٽرانسپورٽ منصوبن جو مقصد ماحولياتي آلودگي ۾ گهٽتائي آڻڻ، ايندھن تي خرچ گهٽائڻ ۽ عوام کي جديد، محفوظ ۽ سستي سفري سهولتون مهيا ڪرڻ آهي.
