راولپنڊي: پاڪستان تحريڪ انصاف جي چيئرمين بئريسٽر گوهر چيو آهي ته ملاقات واري ڏينهن به باني پي ٽي آءِ عمران خان سان ڪنهن کي به ملڻ جي اجازت نه ڏني وئي، جڏهن ته وزيراعظم ڳالهين جي دعوت ڏني، پر حڪومت سان ڳالهين ۾ ڪا به اڳڀرائي نه ٿي.
اڊيالا جيل ٻاهران ميڊيا سان ڳالهائيندي بئريسٽر گوهر چيو ته 36 هفتا گذري چڪا آهن، پر اڃا تائين باني پي ٽي آءِ سان ملاقات نه ٿي سگهي آهي، جنهن سبب ڳڻتي وڌي رهي آهي.
هن چيو ته جڏهن عمران خان سان ملاقات ٿيندي ته معلوم ٿيندو ته سندس سوچ ۽ موقف ڇا آهي. سندس خاندان جو به مطالبو آهي ته عمران خان جي ٽنهي ڀينرن کي ساڻس ملاقات جي اجازت ڏني وڃي.
بئريسٽر گوهر وڌيڪ چيو ته وزيراعظم قومي اسيمبلي جي فلور تان ڳالهين جي دعوت ڏني هئي، پر حڪومت سان ڳالهين ۾ ڪا به اڳڀرائي نه ٿي. سندس چوڻ هو ته هڪ پاسي پي ٽي آءِ ڪارڪنن ۽ اڳواڻن کي سزائون ڏنيون پيون وڃن، جڏهن ته ٻئي پاسي ڳالهين جون ڳالهيون ڪيون پيون وڃن.
هوڏانهن پي ٽي آءِ اڳواڻ سلمان اڪرم راجا چيو ته عمران خان سان ملاقات نه ٿيڻ سبب پارٽي اندر انتشار جي صورتحال پيدا ٿي آهي. هن چيو ته اسان چاهيون ٿا ته باني پي ٽي آءِ سان ملاقات ٿئي ته جيئن سندن هدايتون ملي سگهن، ڇو ته ملاقات نه ٿيڻ ۽ هدايتون نه ملڻ سبب پارٽي قيادت دٻاءُ هيٺ آهي.
