راجسٿان: ڀارت جي رياست راجسٿان ۾ دهلي-ممبئي ايڪسپريس وي تي تيز رفتار بس ٽرڪ سان ٽڪرائجي وئي، جنهن جي نتيجي ۾ 7 ڄڻا فوت ۽ 22 کان وڌيڪ زخمي ٿي پيا.
ڀارتي ميڊيا موجب، حادثو گذريل رات لڳ ڀڳ اڍائي وڳي پيش آيو، جڏهن بس رشي ڪيش کان مدهيه پرديش جي شهر اندور وڃي رهي هئي.
رپورٽن موجب، تيز رفتاري سبب بس ٽرڪ سان ٽڪرائجي وئي، جنهن کانپوءِ ٻنهي گاڏين کي باهه لڳي وئي.
ميڊيا موجب، بس ۾ سوار 5 ڄڻا سڙي فوت ٿي ويا، جڏهن ته 2 ڄڻا مٿي تي سخت ڌڪ لڳڻ سبب دم ڏئي ويٺا. حادثي ۾ 22 کان وڌيڪ ماڻهو زخمي پڻ ٿيا.
ريسڪيو اختيارين جو چوڻ آهي ته اطلاع ملندي ئي امدادي ٽيمون ۽ فائر برگيڊ واقعي واري هنڌ پهچي ويون ۽ گاڏين ۾ لڳل باهه تي ضابطو آندو.
اختيارين موجب، زخمين ۾ گهڻا ٻار ۽ عورتون شامل آهن، جن کي ضلعي دوسه جي اسپتال منتقل ڪيو ويو آهي.
ميڊيا رپورٽن موجب، حادثي جو اصل سبب اڃا تائين سامهون نه اچي سگهيو آهي، جڏهن ته پوليس کي شڪ آهي ته بس ڊرائيور کي ننڊ اچي وئي هوندي، جڏهن ته تيز رفتاري به حادثي جو اهم ڪارڻ ٿي سگهي ٿي.
مقامي رهواسين الزام لڳايو آهي ته ريسڪيو ۽ فائر برگيڊ جون ٽيمون دير سان پهتيون، جنهن سبب وڌيڪ جاني نقصان ٿيو. سندن چوڻ آهي ته باهه لڳڻ کان لڳ ڀڳ هڪ ڪلاڪ پوءِ بس ۾ ڦاٿل مسافرن کي ٻاهر ڪڍيو ويو.
