ڀارتي رياست بي جے پي جي اتر پرديش حڪومت جو مسيحي برادري خلاف هڪ ٻيو قدم سامهون آيو آهي، حڪومت اسڪولن ۾ ڪرسمس جي موڪلن کي منسوخ ڪري ڇڏيو آهي.
حڪومت اسڪولن کي ڪرسمس جي جاءِ تي اڳوڻي وزيراعظم اٽل ڀاري واجپائي جي سالگره جون تقريبون منعقد ڪرڻ جو حڪم ڏنو آهي.
هي فيصلو اهڙي وقت سامهون آيو آهي جڏهن ڀارت ۾ ڪرسمس جي موقعي تي مسيحي برادري خلاف ڪيترائي تشدد جا واقعا ۽ هراساڻيون جون وڊيوز سوشل ميڊيا تي گردش ڪري رهيون آهن ۽ ڪيترن ئي رياستن ۾ عبادتگاهن ۽ جشن ملهائيندڙن کي نشانو بڻايو پيو وڃي.
اتر پرديش جي هن پاليسي جي خلاف ڀارتي ڪانگريس جي ترجمان سوپريا شرينات چيو آهي ته نريندرا مودي ۽ بي جے پي سڄي ڀارت ۾ نفرت کي هٿي ڏني آهي ۽ مذهبي اقليتن کي نشانو بڻايو پيو وڃي، جنهن تي سڄي دنيا جون نظرون مرکوز آهن.
ماهرين ۽ انساني حقن جي گروپن جو چوڻ آهي ته اسڪولن ۾ ڪرسمس جي موڪلن کي ختم ڪرڻ سبب مسيحي برادري ۾ خوف ۽ پريشاني وڌي رهي آهي ۽ هي فيصلو اقليتن جي حاصل ڪيل حقن جي خلاف آهي.
