اسلام آباد: وفاقي بورڊ آف روينيو (ايف بي آر) گذريل مالي سال دوران مقرر ڪيل هدف کان وڌيڪ ٽيڪس وصوليون ڪندي 27 ارب رپيا اضافي روينيو گڏ ڪيو.
سرڪاري دستاويزن موجب گذريل مالي سال لاءِ 12 هزار 983 ارب رپين جو هدف مقرر ڪيو ويو هو، جڏهن ته ايف بي آر 13 هزار 10 ارب رپيا وصول ڪرڻ ۾ ڪامياب رهيو.
دستاويزن مطابق انڪم ٽيڪس جي مد ۾ 6 هزار 651 ارب 90 ڪروڙ رپيا، سيلز ٽيڪس جي مد ۾ 4 هزار 731 ارب 70 ڪروڙ رپيا وصول ڪيا ويا.
ان کان علاوه فيڊرل ايڪسائيز ڊيوٽي جي مد ۾ 840 ارب رپيا ۽ ڪسٽمز ڊيوٽي جي مد ۾ 1 هزار 385 ارب 30 ڪروڙ رپيا گڏ ڪيا ويا، جڏهن ته مجموعي گراس وصوليون 13 هزار 609 ارب رپيا رهيون.
دستاويزن موجب ايف بي آر گذريل مالي سال دوران 598 ارب 60 ڪروڙ رپيا ريفنڊ جي صورت ۾ ادا ڪيا، جنهن کان پوءِ نيٽ وصوليون 13 هزار 10 ارب 30 ڪروڙ رپيا رهيون.
صرف جون جي مهيني دوران انڪم ٽيڪس مان 1 هزار 48 ارب 50 ڪروڙ رپيا، سيلز ٽيڪس مان 511 ارب 30 ڪروڙ رپيا، فيڊرل ايڪسائيز ڊيوٽي مان 95 ارب 20 ڪروڙ رپيا ۽ ڪسٽمز ڊيوٽي مان 165 ارب رپيا وصول ڪيا ويا.
دستاويزن موجب جون ۾ مجموعي گراس ٽيڪس وصوليون 1 هزار 820 ارب 10 ڪروڙ رپيا رهيون، جڏهن ته 43 ارب رپين جا ريفنڊ جاري ڪرڻ کان پوءِ نيٽ وصوليون 1 هزار 777 ارب رپيا رڪارڊ ڪيون ويون.
