بدین (محفوظ شاہ): سندھ کے معروف سینئر فنکار بادل راہی نے شدید بیماری اور مالی مشکلات کے باعث علاج کے لیے عوام، منتخب نمائندوں، مخیر حضرات اور حکومتِ سندھ سے مالی تعاون کی اپیل کی ہے۔
نیشنل پریس کلب بدین میں پریس کانفرنس کرتے ہوئے بادل راہی نے کہا کہ انہوں نے اپنی پوری زندگی سندھی فن، ثقافت اور موسیقی کی خدمت میں گزاری، مگر آج شدید علالت کے باعث علاج کے اخراجات برداشت کرنے سے قاصر ہیں اور مالی مدد کے محتاج ہو چکے ہیں۔
انہوں نے بدین کے ایم پی اے، ایم این اے، لاڑ کے بااثر افراد اور حکومت سندھ سے مطالبہ کیا کہ ان کے علاج کے لیے فوری مالی امداد فراہم کی جائے تاکہ وہ مناسب علاج کرا کر دوبارہ صحت یاب ہو سکیں۔
بادل راہی نے مزید کہا کہ کئی سندھی فنکاروں کے بچوں کو روزگار کے مواقع فراہم کیے گئے ہیں، تاہم ان کے بیٹے آج بھی بے روزگار ہیں۔ انہوں نے متعلقہ حکام سے مطالبہ کیا کہ ان کے بیٹوں کے لیے بھی روزگار کا مناسب بندوبست کیا جائے۔
انہوں نے سندھ کے عوام، سماجی تنظیموں اور صاحبِ حیثیت افراد سے اپیل کی کہ وہ ان کی جلد صحت یابی کے لیے دعا کرنے کے ساتھ ساتھ اپنی استطاعت کے مطابق مالی تعاون بھی کریں تاکہ وہ بہتر علاج حاصل کر کے اپنے فنی سفر کو جاری رکھ سکیں۔
