واشنگٽن: آمريڪا مقبوضه بيت المقدس (يروشلم) ۾ نئون ۽ مستقل سفارتخانو تعمير ڪرڻ لاءِ باضابطه معاهدي تي صحيون ڪري ڇڏيون آهن.
هڪ تقريب دوران اسرائيل جي پرڏيهي وزير گيڊئون سار ۽ اسرائيل ۾ آمريڪي سفير مائيڪ هاڪبي مقبوضه بيت المقدس ۾ مستقل آمريڪي سفارتخاني لاءِ زمين جي الاٽمينٽ واري معاهدي کي پيش ڪيو.
اسرائيل ۾ آمريڪي سفير مائيڪ هاڪبي تقريب کي خطاب ڪندي چيو ته آمريڪا يروشلم کي يهودي عوام جي ازلي، مقامي ۽ هميشه جي گاديءَ جو هنڌ تسليم ڪري ٿو.
هن وڌيڪ چيو ته آمريڪا يروشلم ۾ پنهنجو جهنڊو نصب ڪندو ۽ هتي هڪ نئون، مستقل سفارتي ڪمپليڪس تعمير ڪيو ويندو، جيڪو اسرائيل ۾ آمريڪي سفارتي سرگرمين جو مرڪز هوندو.
اسرائيل جي پرڏيهي وزير هن معاهدي جي آجيان ڪندي چيو ته اهو ٻنهي ملڪن وچ ۾ “ناقابلِ شڪست اتحاد” جي عڪاسي ڪري ٿو.
اعلاميي موجب آمريڪي سفارتخانو ڏاکڻي مقبوضه بيت المقدس ۾ واقع ايلنبي ڪمپائونڊ ۾ تعمير ڪيو ويندو.
ٻئي طرف اسرائيلي انساني حقن واري تنظيم عداله هن منصوبي جي مذمت ڪندي چيو آهي ته اهو قدم “هڪ گهري تاريخي ناانصافي کي قانوني حيثيت ڏيڻ جي برابر آهي.”
واضح رهي ته مقبوضه بيت المقدس اسرائيل ۽ فلسطين وچ ۾ سڀ کان وڌيڪ تڪراري شهرن مان هڪ آهي. فلسطيني اوڀر يروشلم کي مستقبل جي فلسطيني رياست جي گاديءَ جو هنڌ بڻائڻ جو مطالبو ڪندا رهيا آهن.
ياد رهي ته آمريڪي صدر ڊونلڊ ٽرمپ پنهنجي پهرين صدارتي دور ۾ ڊسمبر 2017ع ۾ يروشلم کي اسرائيل جي گاديءَ جو هنڌ تسليم ڪندي آمريڪي سفارتي مشن کي تل ابيب مان منتقل ڪرڻ جو حڪم ڏنو هو.
