اسلام آباد: قومي اسيمبلي سيڪريٽريٽ سان لاڳاپيل هڪ وڏي جعلسازي جو انڪشاف ٿيو آهي، جتي پاڻ کي قومي اسيمبلي سيڪريٽريٽ جو گريڊ 17 جو آفيسر ظاهر ڪندڙ هڪ شخص کي گرفتار ڪيو ويو آهي. قومي اسيمبلي جي ترجمان موجب جوابدار عبد الواحد، جيڪو ضلعي گهوٽڪي جو رهواسي آهي، ڊگهي عرصي کان پاڻ کي قومي اسيمبلي جو ملازم ۽ آفيسر ظاهر ڪري مختلف غيرقانوني سهولتن ۽ پروٽوڪول مان فائدو وٺندو رهيو.
ترجمان موجب گرفتار ٿيل عبد الواحد وٽ قومي اسيمبلي سيڪريٽريٽ جو هڪ جعلي تقرري نامو پڻ موجود هو، جنهن تي قومي اسيمبلي جي اسپيڪر جا جعلي دستخط به ڪيا ويا هئا. ابتدائي جاچ مان معلوم ٿيو آهي ته جوابدار جعلي سرڪاري سڃاڻپ استعمال ڪري مختلف هنڌن تي پنهنجو اثر رسوخ قائم ڪرڻ جي ڪوشش ڪندو رهيو ۽ ڪيترن ئي ماڻهن کي گمراهه ڪندو رهيو.
قومي اسيمبلي جي ترجمان وڌيڪ ٻڌايو ته عوامي شڪايتن ۽ سوشل ميڊيا تي گردش ڪندڙ اطلاعن کان پوءِ اسپيڪر قومي اسيمبلي معاملي جو سخت نوٽيس ورتو ۽ فوري طور لاڳاپيل ادارن کي جاچ ۽ قانوني ڪارروائي جون هدايتون جاري ڪيون. انهن هدايتن جي روشني ۾ فيڊرل انويسٽيگيشن ايجنسي (ايف آءِ اي) جي ڊائريڪٽر جنرل جي نگراني ۾ ڪارروائي ڪندي جوابدار عبد الواحد کي گرفتار ڪيو ويو.
جاچ دوران واضح ٿيو ته عبد الواحد جو قومي اسيمبلي سيڪريٽريٽ سان ڪنهن به قسم جو سرڪاري تعلق نه آهي ۽ نه ئي قومي اسيمبلي جي ملازمن جي رڪارڊ ۾ سندس نالو موجود آهي. ترجمان زور ڀري چيو ته جوابدار جي تقرري بابت قومي اسيمبلي وٽ ڪو به سرڪاري رڪارڊ موجود ناهي، جنهن مان ثابت ٿئي ٿو ته هو مڪمل طور تي جعلي دستاويزن جي بنياد تي پاڻ کي سرڪاري آفيسر ظاهر ڪري رهيو هو.
قومي اسيمبلي سيڪريٽريٽ موجب اسپيڪر جي جعلي صحي سان سرڪاري دستاويز تيار ڪرڻ، پاڻ کي سرڪاري آفيسر ظاهر ڪرڻ ۽ ان بنياد تي مراعتون يا پروٽوڪول حاصل ڪرڻ انتهائي سنگين ڏوهه آهي، جنهن خلاف پاڪستان جي قانون موجب سخت ڪارروائي ٿي سگهي ٿي. اختيارين جو چوڻ آهي ته اهڙن ڏوهن سان نه رڳو قومي ادارن جي ساک متاثر ٿئي ٿي، پر عوام جو اعتماد پڻ مجروح ٿئي ٿو.
ترجمان ٻڌايو ته گرفتار ٿيل شخص مبينا طور مختلف سرڪاري ۽ نيم سرڪاري ادارن ۾ پنهنجو تعارف قومي اسيمبلي جي آفيسر طور ڪرائيندو هو ۽ ان بنياد تي خاص سهولتون، پروٽوڪول ۽ ٻيون غيرقانوني مراعتون حاصل ڪندو رهيو. هاڻي ايف آءِ اي جاچ ڪري رهي آهي ته ڇا هن جعلسازي ۾ ٻيا ماڻهو به شامل هئا يا جوابدار اڪيلو ئي اهو سمورو نيٽ ورڪ هلائي رهيو هو.
ذريعن موجب جاچ دوران جوابدار کان هٿ آيل جعلي دستاويزن، سڃاڻپ سان لاڳاپيل مواد ۽ ٻين شين جو فرانزڪ جائزو پڻ ورتو ويندو ته جيئن معلوم ڪري سگهجي ته اهي ڪهڙي طريقي سان تيار ڪيا ويا ۽ انهن جي تياري ۾ ڪنهن ٻئي فرد يا گروهه جو هٿ ته نه هو.
قومي اسيمبلي جي ترجمان عوام کي خبردار ڪندي چيو ته جيڪڏهن ڪو شخص پاڻ کي قومي اسيمبلي، سينيٽ يا ڪنهن ٻئي اهم سرڪاري اداري جو آفيسر ظاهر ڪري، ته ان جي سڃاڻپ ۽ دستاويزن جي لازمي تصديق ڪئي وڃي. ڪنهن به تقرري نامي، سفارشي خط يا سرڪاري دستاويز تي شڪ هجي ته قومي اسيمبلي سيڪريٽريٽ يا لاڳاپيل اداري سان رابطو ڪري حقيقت معلوم ڪئي وڃي.
ترجمان وڌيڪ چيو ته جديد دور ۾ جعلي دستاويزن ۽ سوشل ميڊيا ذريعي ماڻهن کي دوکو ڏيڻ جا واقعا وڌي رهيا آهن، تنهن ڪري هر شهري جي ذميواري آهي ته ڪنهن به شخص جي دعويٰ تي بنا تصديق جي يقين نه ڪري. سرڪاري عهدن ۽ ادارن جي نالي جو ناجائز استعمال قانوني طور ناقابل قبول آهي ۽ اهڙن عنصرن خلاف سخت قانوني ڪارروائي جاري رهندي.
قومي اسيمبلي سيڪريٽريٽ واضح ڪيو آهي ته ادارن جي ساک ۽ عوام جي اعتماد جي حفاظت لاءِ جعلسازي، ڪوڙي سڃاڻپ ۽ جعلي سرڪاري دستاويزن جي تياري ۾ ملوث ماڻهن کي ڪنهن به صورت ۾ رعايت نه ڏني ويندي. اختيارين موجب عبد الواحد خلاف لاڳاپيل قانونن تحت ڪيس داخل ڪيو ويو آهي ۽ جاچ مڪمل ٿيڻ کان پوءِ وڌيڪ قانوني قدم کنيا ويندا.
