اسلام آباد: استحڪام پاڪستان پارٽي (آءِ پي پي) جي صدر عبدالعليم خان چيو آهي ته ڪشميري عوام جون محروميون ختم ڪرڻ، معياري تعليم، بنيادي سهولتن جي فراهمي ۽ شفاف حڪمراني سندن پارٽي جون اهم ترجيحون آهن. هن زور ڀري چيو ته آزاد ڪشمير جا فيصلا اتي جي عوام جي خواهشن ۽ مفادن موجب ئي ڪيا ويندا ۽ ڪشميري عوام سان ڪيل واعدا هر صورت ۾ پورا ڪيا ويندا.
اسلام آباد ۾ ٿيل هڪ تقريب دوران آزاد ڪشمير جي اڳوڻي وزيراعظم سردار تنوير الياس استحڪام پاڪستان پارٽي ۾ شموليت اختيار ڪئي. سندس گڏ پارٽي ۾ شامل ٿيندڙ ٻين اڳواڻن ۾ ڪرنل محبوب، علي خان سوني، ملڪ ذوالفقار، صاحبه صديق، رياض گجر، طاهر کوکهر، راجا طالب، مرتضيٰ علي احمد، جبار مغل، تقديس گيلاني ۽ ٻيا ڪيترائي سياسي ڪارڪن پڻ شامل هئا.
ان موقعي تي پريس ڪانفرنس ڪندي عبدالعليم خان چيو ته آزاد ڪشمير جي عوام کي ڪيترن ئي سالن کان بنيادي سهولتن، معياري تعليم ۽ ترقياتي منصوبن جي کوٽ کي منهن ڏيڻو پيو آهي، جنهن جو ازالو ڪرڻ سندن پارٽي جي اولين ذميواري هوندي. هن چيو ته جيڪڏهن عوام سندن پارٽي تي اعتماد ڪيو ته ڪشميري عوام جي زندگي بهتر بڻائڻ لاءِ عملي قدم کنيا ويندا.
هن وڌيڪ چيو ته استحڪام پاڪستان پارٽي آزاد ڪشمير ۾ سٺي حڪمراني، شفاف انتظامي نظام ۽ ميرٽ تي ٻڌل فيصلن کي يقيني بڻائڻ چاهي ٿي. سندس چوڻ هو ته حڪومت جو اصل مقصد صرف اقتدار حاصل ڪرڻ نه، پر عوام کي زندگي جون بنيادي سهولتون مهيا ڪرڻ آهي، ڇو ته رڳو تقريرن سان نه پر عملي قدمن سان ئي ماڻهن جي زندگين ۾ حقيقي تبديلي آڻي سگهجي ٿي.
عبدالعليم خان اعلان ڪيو ته آزاد ڪشمير جي هر ٻار تائين تعليم جي سهولت پهچائڻ لاءِ جامع منصوبابندي ڪئي ويندي. هن چيو ته سندن ڪوشش هوندي ته آزاد ڪشمير ۾ سو سيڪڙو ٻارن کي تعليم جا برابر موقعا فراهم ڪيا وڃن، جيئن مستقبل جي نسل کي بهتر تعليم ۽ روشن مستقبل ملي سگهي.
استحڪام پاڪستان پارٽي جي صدر چيو ته جيڪڏهن کين حڪومت ٺاهڻ جو موقعو مليو ته ميرٽ، شفافيت، احتساب ۽ عوامي خدمت کي هر قيمت تي يقيني بڻايو ويندو. سندس چوڻ هو ته سرڪاري ادارن کي سياسي مداخلت کان پاڪ ڪري عوام جي ڀلائي لاءِ استعمال ڪيو ويندو.
هن سياسي جماعتن کي مخاطب ڪندي چيو ته چونڊ نتيجن کي جمهوري انداز ۾ قبول ڪرڻ گهرجي. ڪاميابي جي صورت ۾ عاجزي ۽ شڪست جي صورت ۾ برداشت جو مظاهرو ڪرڻ ئي جمهوريت جو حسن آهي. هن چيو ته جيڪي سياسي جماعتون ٻه، ٻه ۽ ٽي، ٽي ڀيرا حڪومتون ڪري چڪيون آهن، اهي اڄ به عوامي محرومين بابت سوال اٿاري رهيون آهن، جڏهن ته کين پهرين پنهنجي ڪارڪردگي جو حساب ڏيڻ گهرجي.
عبدالعليم خان وزيراعظم جي قيادت کي به ساراهيندي چيو ته وزيراعظم ڏکين حالتن ۾ ڪڏهن به همت نه هاري ۽ هميشه قومي مفادن کي ترجيح ڏني. هن ٻڌايو ته هن وزيراعظم کي درخواست ڪئي هئي ته کيس مواصلات واري وزارت تي مڪمل ڌيان ڏيڻ جو موقعو ڏنو وڃي ته جيئن ملڪ جي انفراسٽرڪچر کي جديد بنيادن تي ترقي ڏئي سگهجي.
هن ملڪ ۾ جاري ترقياتي منصوبن بابت ٻڌايو ته جديد شاهراهون ۽ موٽروي منصوبن تي تيزي سان ڪم جاري آهي. سندس چوڻ هو ته گلگت بلتستان ۾ اهم شاهراهن جي تعمير جاري آهي، جڏهن ته سکر کان ڪراچي موٽروي کي بندرگاهه سان ڳنڍڻ وارو اهم منصوبو به هلندڙ سال شروع ڪيو ويندو، جنهن سان واپار ۽ آمدرفت کي هٿي ملندي.
عبدالعليم خان وڌيڪ چيو ته لاهور – سيالڪوٽ موٽروي کي چار بدران ڇهه رُخا بڻايو پيو وڃي، جڏهن ته لاهور، سيالڪوٽ، کاريان ۽ اسلام آباد کي ملائيندڙ موٽروي جي تعمير به جاري آهي. هن چيو ته ان منصوبي سان لاهور ۽ اسلام آباد جي وچ ۾ لڳ ڀڳ 100 ڪلوميٽرن جو فاصلو گهٽجي ويندو، جنهن سان سفر وڌيڪ تيز، محفوظ ۽ آسان بڻجندو.
هن ٻڌايو ته اسلام آباد – مري ايڪسپريس وي کي مظفرآباد تائين وڌايو پيو وڃي، جڏهن ته مظفرآباد کي مانسهره سان جديد شاهراهه ذريعي به ڳنڍيو ويندو. سندس چوڻ هو ته انهن منصوبن سان آزاد ڪشمير جي عوام کي محفوظ، تيز رفتار ۽ معياري سفري سهولتون ملنديون، سياحت کي هٿي ملندي ۽ علائقي جي معاشي سرگرمين ۾ به نمايان واڌارو ايندو.
آخر ۾ عبدالعليم خان چيو ته استحڪام پاڪستان پارٽي جو مقصد رڳو سياسي نعرا هڻڻ نه، پر عملي ڪارڪردگي ذريعي عوام جي اعتماد تي پورو لهڻ آهي. هن چيو ته عوام جي خدمت، ترقياتي منصوبن جي تڪميل، تعليم، صحت، شفاف حڪمراني ۽ بنيادي سهولتن جي فراهمي ئي سندن سياسي منشور جو بنيادي حصو آهي، ۽ جيڪڏهن عوام کين موقعو ڏنو ته اهي انهن واعدن کي عملي جامو پارائڻ لاءِ هر ممڪن قدم کڻندا.
