لاهور: لاهور ۾ ٻن پرڏيهي عورتن جي مبينا اغوا ۽ زيادتي واري ڪيس ۾ هڪ متاثره عورت جي مجسٽريٽ آڏو قلمبند ڪرايل حلفي بيان جو ڪجهه حصو سامهون اچي ويو آهي، جنهن ۾ هن واقعي بابت سنگين الزام ۽ اهم انڪشاف ڪيا آهن.
ميڊيا رپورٽن موجب متاثره عورت اسٽرڊ گيبريلا رابنسن پنهنجي بيان ۾ ٻڌايو ته سندس عمر 40 سال آهي ۽ هوءَ اسپين جي شهر هونڊاس ڊي لاس جي رهواسڻ آهي. هن چيو ته سندس سان پيش آيل واقعو گهڻي حد تائين ٻي متاثره عورت اسٽيفني جي بيان سان ملي ٿو.
گيبريلا رابنسن موجب جنهن گهر ۾ هوءَ ترسيل هئي، اتي رهائش دوران سندس تجربو انتهائي خوفناڪ رهيو. هن الزام هنيو ته پهرين رات چار هٿياربند ماڻهو گهر ۾ داخل ٿيا، جن کين زبردستي قابو ڪري ٻڌي ڇڏيو. سندس چوڻ هو ته جوابدارن مان هڪ شخص، جنهن ڪارا ڪپڙا پاتل هئا، سندس جسم کي نامناسب انداز ۾ هٿ لاتو، جڏهن ته کيس چهري تي ڪيترائي ڀيرا مڪا پڻ هنيا ويا.
متاثره عورت پنهنجي حلفي بيان ۾ وڌيڪ الزام لڳايو ته ان دوران کيس سخت تشدد جو نشانو بڻايو ويو. هن دعويٰ ڪئي ته هڪ موقعي تي سندس مٿي تي پستول جي بٽ سان تمام زور سان وار ڪيو ويو، جنهن سبب کيس شديد تڪليف پهتي. سندس چوڻ هو ته واقعي دوران اتي هڪ ٻيو شخص به موجود هو، جيڪو تمام سٺي انگريزي ڳالهائي رهيو هو ۽ مختلف سوال پڇي رهيو هو.
عدالت ۾ قلمبند ڪرايل بيان موجب، ڪجهه دير بعد رضا ڊار نالي شخص اتي آيو ۽ هن کان ڪمپيوٽر ۽ پئسن بابت پڇا ڪئي. متاثره عورت ٻڌايو ته هن جواب ۾ چيو ته ڪمپيوٽر ۽ رقم سائي رنگ جي ٿيلهي ۾ رکيل آهن.
هن وڌيڪ ٻڌايو ته ان دوران ٻي متاثره عورت اسٽيفني کي به واپس آندو ويو، جنهن کان پوءِ موجود ماڻهو ٻنهي عورتن کان بار بار ڪمپيوٽر، پاسورڊ ۽ ٻين ذاتي معلومات بابت سوال ڪندا رهيا. سندس چوڻ هو ته ٻنهي عورتن تي دٻاءُ وڌو ويو ته هو پنهنجا پاسورڊ ۽ ٻين شين بابت ڄاڻ فراهم ڪن.
هي بيان ڪيس جي جاچ دوران مجسٽريٽ آڏو قلمبند ڪرايو ويو، جنهن جا ڪجهه حصا هاڻي ميڊيا تي سامهون آيا آهن. جاچ ڪندڙ ادارا بيان ۾ ڪيل الزامن جي مختلف پهلوئن کان جاچ ڪري رهيا آهن.
واضح رهي ته هي الزام متاثره عورت جي حلفي بيان تي ٻڌل آهن ۽ انهن بابت عدالت طرفان اڃا تائين ڪو حتمي فيصلو سامهون ناهي آيو. ڪيس جي وڌيڪ جاچ ۽ عدالتي ڪارروائي جاري آهي، جنهن کان پوءِ ئي حقيقتن ۽ ذميوارين جو قانوني طور تعين ڪيو ويندو.
