تهران: ايران آبنائے هرمز ۾ ڪنهن به قسم جي پرڏيهي فوجي چرپر تي سخت ردعمل ظاهر ڪندي غير ملڪي فوجي طاقتن کي خبردار ڪيو آهي ته هي اهم سامونڊي گذرگاهه غير علائقائي قوتن جي فوجي نمائش يا طاقت جي اظهار لاءِ استعمال نه ٿيڻ گهرجي.
ايراني نائب وزير خارجه ڪاظم غريب آبادي پنهنجي بيان ۾ چيو ته آبنائے هرمز غير علائقائي طاقتن جي فوجي مظاهرن جو ميدان ناهي. هن زور ڀري چيو ته ايران، آبنائے هرمز جي سلامتي جو ذميوار ساحلي ملڪ هجڻ جي حيثيت سان، هن سامونڊي رستي ۾ ڪنهن به قسم جي فوجي نقل و حرکت يا اهڙين سرگرمين بابت خبردار ڪري ٿو، جيڪي علائقي جي امن ۽ استحڪام لاءِ خطرو بڻجي سگهن.
ڪاظم غريب آبادي وڌيڪ چيو ته آبنائے هرمز جي سلامتي ۽ تحفظ جي ذميواري ان سان لاڳاپيل ساحلي رياستن تي عائد ٿئي ٿي، تنهن ڪري علائقي کان ٻاهر جون طاقتون هتي فوجي موجودگي وڌائڻ يا طاقت جو مظاهرو ڪرڻ کان پاسو ڪن.
هن چيو ته جيڪڏهن ڪنهن ڌر طرفان اهڙا قدم کنيا ويا، جن سان علائقي ۾ ڇڪتاڻ يا بحران پيدا ٿيو، ته ان جا نتيجا ۽ ذميواريون به اهڙيون مهم جوئي ڪندڙ قوتون پاڻ برداشت ڪنديون.
ايراني نائب وزير خارجه جو چوڻ هو ته آبنائے هرمز عالمي واپار، خاص طور تي توانائي جي فراهمي لاءِ انتهائي اهم سامونڊي گذرگاهه آهي، تنهن ڪري ان جي سلامتي، استحڪام ۽ کليل رهڻ کي يقيني بڻائڻ سڀني ساحلي ملڪن جي گڏيل ذميواري آهي.
واضح رهي ته آبنائے هرمز دنيا جي اهم ترين سامونڊي واپاري رستن مان هڪ آهي، جتان عالمي سطح تي تيل ۽ گيس جي وڏي مقدار جي ترسيل ٿيندي آهي. ان ڪري هن علائقي ۾ پيدا ٿيندڙ ڪنهن به قسم جي فوجي ڇڪتاڻ يا تڪرار جا اثر عالمي توانائي مارڪيٽن ۽ بين الاقوامي واپار تي به پئجي سگهن ٿا.
