ڪراچي جي لي مارڪيٽ ۾ 6 ورهين جي عبدالولي جي قتل جي جاچ جاري آهي جڏهن ته گرفتار جوابدار حمزه جاچ دوران اهم انڪشاف ڪيا آهن.
جوابدار حمزه اعتراف ڪيو ته مقتول ٻارڙو ولي مون کي چاچي جيان مڃيندو هو مان انهي کي شيون وٺي ڏيندو هئس. انهي ڏينهن پاڙي ۾ فوتگي ٿي هئي، ولي جا سمورا گهر ڀاتي اتي ويل هئا. جنازي جي دوران موقعو ڏسي مان ولي کي فليٽ ۾ وٺي ويس جتي مون انهي کي جنسي زيادتي کان پوءِ قتل ڪري ڇڏيو.
جوابدار حمزه چيو ته ولي کي قتل ڪرڻ کان پوءِ به مون انهي سان ٻيهر زيادتي ڪئي هئي، ولي مون کي سڃاڻيندو هو انهي جي ڪري کيس قتل ڪيو قتل کان پوءِ مون انهي جي لاش ٻوري ۾ بند ڪري ڪمبل ۾ ويڙهي الماڙي ۾ لڪائي ڇڏي هئي. پوليس فليٽ جي 3 ڀيرا تلاشي ورتي پر لاش هٿ اچي نه سگهي، علائقي وارن جو مون تي شڪ وڌڻ کان پوءِ مون کي ڊپ لڳڻ شروع ٿي ويو. پاڙي وارن جو شڪ ختم ڪرڻ جي لاءِ مان ولي جي گهر ڀاتين سان گڏ ڳوليندو رهيس.
سي سي ٽي وي مان خبر پئي ٿي ته ٻارڙو علائقي کان ٻاهر نه ويو هو، جوابدار اعتراف ڪيو ته ڊپ سبب لاش کي فليٽ جي دريءَ مان هيٺ ڦٽو ڪيو، پوليس جڏهن فليٽ ۾ پهتي ته مان ڪمري ۾ اڪيلو موجود هئس. پوليس موجب مڇريل علائقي جي رهواسين جوابدار کي سخت تشدد جو نشانو بنايو. گرفتار جوابدار حمزه جاچ دوران دعويٰ ڪئي ته واردات ۾ ٻيا ماڻهو به ملوث آهن. پوليس جوابدار حمزه جي والد کي به تحويل ۾ وٺي ڇڏيو آهي.
پوليس موجب جوابدار حمزه کان وڌيڪ انڪشاف سامهون اچڻ جو امڪان آهي، پوليس جوابدار حمزه جو اڳوڻو ڪرمنل رڪارڊ به چيڪ ڪري رهي آهي. پوليس ماضي ۾ ڪنهن ٻئي ٻارڙي سان زيادتي يا بدفعلي جي معاملي جي جاچ به ڪري رهي آهي پوليس اختيارين جو چوڻ آهي ته جوابدار حمزه کي اڄ جسماني ريمانڊ جي لاءِ عدالت ۾ پيش ڪيو ويندو.
پوليس سرجن ڪراچي ڊاڪٽر سمعيه سعيد چيو ته مقتول ولي جي لاش پراڻي ۽ ڳري وئي هئي، ولي جي مٿي تي فريڪچر ۽ ڳچيءَ تي تشدد جا نشان آهن، مقتول سان بدفعلي جي حوالي سان سيمپل ورتا ويا آهن، موت جو سبب ڄاڻڻ جي لاءِ عضون کي ڪيميائي تجربي جي لاءِ محفوظ ڪيو ويو آهي.
پوليس سرجن ڪراچي ڊاڪٽر سمعيه سعيد چيوته موت جو سبب ۽ جنسي زيادتي جي تصديق ڪيميڪل اگزامن رپورٽ جي روشني ۾ ڪئي ويندي. ياد رهي ته 6 ورهين جو ٻارڙو ولي سومر جي ڏينهن گهر مان شيءَ وٺڻ لاءِ نڪتو هو جيڪو بعد ۾ گم ٿي ويو هو ۽ اربع جي رات ولي جي ٻوري ۾ بند لاش ملي هئي.
