صادق فقير ڊگري ڪاليج مٺيءَ ۾ آفيس سپرنٽنڊنٽ مھراڻ خان عمراڻي جي رٽائرمينٽ تي پروقار الوداعي تقريب

صادق فقير گورنمينٽ بوائز ڊگري ڪاليج مٺيءَ ۾ ڪاليج جي آفيس سپرنٽنڊنٽ مھراڻ خان عمراڻي جي 60 سال عمر مڪمل ٿيڻ ۽ سرڪاري ملازمت مان رٽائرمينٽ جي موقعي تي هڪ پروقار الوداعي تقريب ۽ پارٽي منعقد ڪئي وئي، جنهن ۾ ڪاليج جي پرنسپال، ليڪچرارن، شاگردن، دوستن، مٽن مائٽن ۽ زندگي جي مختلف شعبن سان تعلق رکندڙ شخصيتن شرڪت ڪئي. تقريب دوران مھراڻ خان عمراڻي سالگرهه جو ڪيڪ پڻ ڪاٽيو. ان موقعي تي کيس اجرڪون ۽ لنگيون اوڍائي عزت افزائي ڪئي وئي. سندس خاندان جي ڊاڪٽر مرتضيٰ عمراڻي ۽ ڊاڪٽر نديم عمراڻي پڻ تقريب ۾ شرڪت ڪئي. مھراڻ حبيب الله عمراڻي ولد حبيب الله عمراڻي جو تعلق ڳوٺ سجائي، تعلقو ڏيپلو، ضلعو ٿرپارڪر سان آهي. سندس تاريخِ پيدائش 12 آگسٽ 1966ع آهي. هن پنهنجي ابتدائي تعليم ڳوٺ سجائي مان حاصل ڪئي، جڏهن ته ميٽرڪ هاءِ اسڪول ڏيپلو مان، انٽر صادق فقير گورنمينٽ بوائز ڊگري ڪاليج مٺي مان ۽ ايم اي جي ڊگري سنڌ يونيورسٽي ڄامشورو مان حاصل ڪئي. مھراڻ خان عمراڻي پنهنجي سرڪاري ملازمت جي شروعات 22 سيپٽمبر 1986ع تي ڪئي. هن پنهنجي تقريباً 40 سالن جي سروس دوران مختلف سرڪاري ادارن ۾ ذميواريون نڀايون. سندس سروس جو اهم حصو، لڳ ڀڳ 18 سال، صادق فقير گورنمينٽ بوائز ڊگري ڪاليج مٺي ۾ گذريو، جتي هن گريڊ 17 جي آفيس سپرنٽنڊنٽ طور خدمتون سرانجام ڏنيون. ان کان علاوه مھراڻ خان عمراڻي ميرپورخاص I.R. گرلز ڪاليج ۽ ماڊل ڪاليج ۾ پڻ خدمتون سرانجام ڏنيون. هن EDO آفيس عمرڪوٽ ۾ تقريباً 6 مهينا اڪائونٽس آفيسر طور، جڏهن ته EDO آفيس ٿرپارڪر ۾ تقريباً 2 سال اڪائونٽس آفيسر طور پڻ پنهنجون ذميواريون ايمانداري سان نڀايون. تقريب کي خطاب ڪندي مقررين چيو ته مھراڻ خان عمراڻي پنهنجي ڊيوٽي ۽ فرض کي هميشه ايمانداري، فرض شناسي ۽ ذميواري سان نڀايو. هن ڪڏهن به پنهنجي فرض ۾ غفلت نه ڪئي. جتي به خدمتون سرانجام ڏنائين، اتي علم جي لاٽ کي روشن رکڻ ۽ شاگردن جي مدد ڪرڻ ۾ اهم ڪردار ادا ڪيو ۽ هڪ بڙ جي وڻ وانگر ڇانوَ ڏيندڙ شخصيت جو مثال قائم ڪيو. مقررين وڌيڪ چيو ته مھراڻ خان عمراڻي ٿرپارڪر جهڙي پوئتي پيل ضلعي ۾ پنهنجي اولاد سان گڏ مٽن مائٽن ۽ ڳوٺ جي ڪيترن ئي ٻارن کي تعليم ڏيارڻ ۾ اهم ڪردار ادا ڪيو. هو ڳوٺ جي شاگردن کي پنهنجي اولاد وانگر سمجهندو هو ۽ ڪيترن ئي مستحق شاگردن جي تعليمي خرچن ۾ پڻ مدد ڪندو رهيو. مھراڻ خان عمراڻي هڪ مهمان نواز ۽ دوست نواز شخصيت طور پڻ سڃاتو وڃي ٿو. هو هميشه دوستن ۽ مهمانن کي عزت ۽ احترام ڏيندو رهيو آهي. وسڪاري جي مند ۾ پري پري کان ايندڙ مهمانن جي مهمان نوازي ڪرڻ سندس خاص خوبي رهي آهي. هو عمراڻي برادري جي هڪ معزز ۽ عزت واري شخصيت طور پڻ سڃاتو وڃي ٿو. مقررين سندس ڊگهي سرڪاري خدمتن، تعليمي خدمتن، شاگردن سان محبت ۽ سماجي ڪردار کي ساراهيندي چيو ته رٽائرمينٽ سرڪاري ملازمت جو اختتام آهي، پر سماج لاءِ خدمتن جو اختتام نه آهي. اميد آهي ته مھراڻ خان عمراڻي مستقبل ۾ پڻ پنهنجي تجربي ۽ علم سان نئين نسل جي رهنمائي ڪندو رهندو. آخر ۾ تقريب ۾ شريڪ مهمانن پاران مھراڻ خان عمراڻي لاءِ نيڪ تمنائن جو اظهار ڪيو ويو ۽ رب پاڪ کان سندس صحتمند، خوشحال ۽ ڊگهي زندگي لاءِ دعا گهري وئي. بعد ۾ سمورن مهمانن کي ريفريشمينٽ ڪرائي وئي ۽ تقريب خوشگوار ماحول ۾ پڄاڻي تي پهتي.