جماعت اسلامي جي امير حافظ نعيم الرحمان وياج جي شرح ۾ گهٽ ۾ گهٽ 3 سيڪڙو گهٽائي جو مطالبو ڪندي چيو آهي ته حڪومت 20 سيپٽمبر جي اسلام آباد مارچ ۾ رنڊڪ وجهڻ کان پاسو ڪري، ٻئي صورت ۾ انهي جي ذميواري حڪومت مٿان هوندي. هن چيو ته پيٽروليم ليوي جو مڪمل خاتمو جماعت اسلامي جو بنيادي مطالبو آهي، حڪومت طرفان ڏنل رليف پيڪيج خوشي جوڳو پر اڻپورو آهي.
پنجاب اسيمبلي جي سامهون جماعت اسلامي جي ڌرڻي جي هنڌ تي پريس ڪانفرنس ڪندي حافظ نعيم الرحمان چيو ته سموري ملڪ ۾ پيٽروليم ليوي جي خلاف ڌرڻن جو تعداد 40 ٿي ويو آهي اڄ احتجاج جو 30هون ڏينهن آهي. حافظ نعيم موجب ڌرڻو هاڻ هڪ قومي تحريڪ جي شڪل اختيار ڪري چڪو آهي جنهن ۾ عورتن سميت عوام جي شرڪت روزاني وڌي رهي آهي.
هن چيو ته حڪومت ڳالهين جي لاءِ وڌيڪ هڪ ڏينهن جو وقت گهريو آهي. ڳالهيون اڄ ٿين يا سڀاڻي جماعت اسلامي جو مطالبو چٽو آهي ته پيٽروليم ليوي ختم ڪئي وڃي. حڪومت جو اهو چوڻ ته ليوي ختم ڪرڻ جي صورت ۾ خرچ ڪيئن پورا ٿيندا قبول ڪرڻ جوڳو جواب نه آهي. ڇو ته جماعت اسلامي جي ڳالهين واري ٽيم ليوي جي متبادل سميت 6 تجويزون حڪومت کي ڏئي چڪي آهي.
حافظ نعيم الرحمان چيو ته حڪومت رليف پيڪيج جي لاءِ 500 ارب روپين جي بجيٽ استعمال ڪرڻ جو فيصلو ڪيو آهي پر مهانگائي جي موجوده حالتن ۾ في ليٽر 100 روپين جو رليف به اڻپورو آهي. رپليف پيڪيج کان وڌيڪ ضروري ليوي جو خاتمو آهي.
وياج جي شرح جي حوالي سان هن چيو ته اڄ مانيٽري پاليسي جو اجلاس ٿي رهيو آهي انهي لاءِ وياج جي شرح ۾ گهٽ ۾ گهٽ 3 سيڪڙو گهٽتائي ڪئي وڃي. هن جو چوڻ هو ته حڪومت جو اهو موقف صحيح نه آهي ته وياج جي شرح گهٽ ٿيڻ سان مهانگائي وڌندي. وياج مڪمل طور تي ختم ڪرڻو پوندو ۽ وياج جي شرح ۾ 3 سيڪڙو گهٽتائي سان حڪومت کي تقريبن 1700 ارب روپين جي ليوي گهٽ ڪرڻ جي گنجائش پيدا ٿي سگهي ٿي.
هن چيو ته اسٽيٽ بينڪ جي خودمختاري جو موجوده نظام حڪومتن ٺاهيو. جماعت اسلامي انهي جي مخالفت ڪئي هئي. اسٽيٽ بينڪ جي گورنر ۽ ميمبرن جي مقرري حڪومت ئي ڪندي آهي. انهي جي لاءِ مڪمل طور تي خودمختار قرار ڏئي عوامي مطالبن کان بچي نٿو سگهجي.
حافظ نعيم الرحمان وڌيڪ چيو ته جماعت اسلامي جا ڌرڻا جاري رهندا، حڪومت سان به ڳالهيون ٿينديون رهنديون، 20 سيپٽمبر جي اسلام آباد مارچ جون تياريون مڪمل آهن، جماعت اسلامي اسلام آٻاد پهچي صرف احتجاج ڪري واپس نه ايندي پر عوام کي رليف ڏيارڻ جي لاءِ پنهنجو احتجاج جاري رکندي. جماعت اسلامي پرامن پارٽي آهي پر ڪارڪن گرفتارين ۽ قربانين جي لاءِ تيار آهن. سمورين اپويشن پارٽين کي عوامي مسئلن تي متحد ٿيڻ جي ضرورت آهي. پي ٽي آءِ سميت سمورين سياسي پارٽين کي آئيني، قانوني طور تي احتجاج جو حق ملڻ گهرجي.
