يونيورسٽي انتظاميا کي ملازمن جي جائز مسئلن جي حل لاءِ درخواست ڏني وئي آهي ،وائيس چانسلر ڊاڪٽر نيڪ محمد

لاڙڪاڻو(رپورٽ مريد علي سولنگي) آل سنڌ يونيورسٽيز ايمپلائيز فيڊريشن جي چيئرمين ۽ دي يونيورسٽي آف لاڙڪاڻو ايمپلائيز ويلفيئر ايسوسيئيشن جي صدر سراج احمد ڀٽو چيو آهي ته گذريل هفتي کان ٽيچرس ايسوسيئيشن پاران استادن جي پگهارن مان غير قانوني ڪٽوتي ۽ ٻين مسئلن جي حل لاءِ ڪلاسن جو مڪمل بائيڪاٽ ڪيو ويو آهي، جنهن جي اسان مڪمل حمايت ڪريون ٿا، جڏهن ته دي يونيورسٽي آف لاڙڪاڻو جو وائيس چانسلر ڊاڪٽر نيڪ محمد شيخ نه صرف ٽيچرس پر ملازمن، آفيسرن ۽ شاگردن سان به ناانصافيون ڪري رهيو آهي. هن چيو ته گذريل يونيورسٽي انتظاميا کي ملازمن جي جائز مسئلن جي حل لاءِ درخواست ڏني وئي آهي جنهن ۾ ملازمن جي جنرل ۽ ٽيڪنيڪل ڊي پي سي ۽ سليڪشن بورڊ ۽ ايناملي ڪاميٽي مان منظور ٿيل اپگريڊيشن ۽ پروموشن، جن ٽيڪنيڪل ملازمن جا پروموشن آرڊر نڪتل آهن انهن جي پي فڪسيشن، رٽائرڊ ۽ فوت ٿيل ملازمن کي پينشن ڪنٽريبيوشن جي رقم جي ادائيگي، فوت ٿيل ملازمن جي اولاد کي نوڪري جا آرڊر، جن ملازمن جا ميڊيڪل بل ميٽنگ مان منظور ٿيل آهن انهن کي رقم جاري ڪرڻ ۽ جن جا بل جمع ٿيل آهن ميٽنگ ڪري انهن کي رقم ڏيڻ، ميڊيڪل ايڊوانس لاءِ درخواست ڏيندڙ ملازمن کي فوري ميڊيڪل ايڊوانس، ٽرانسپورٽ پاليسي، ايگزام رمونريشن ۽ ويلفيئر لون جي بحالي، ڪچن ملازمن کي پهرين سينڊيڪيٽ مان منظور ٿيل ٽن سالن واري پاليسي تحت ريگيولر ڪرڻ، ملازمن جي مختلف پگهار، پروموشن ڊفرنس ۽ رمونريشن جي بقايا رقمن جي ادائيگي، ايمپلائيز ويلفيئر ايسوسيئيشن خلاف نڪتل سمورا ليٽر ۽ سرڪيولر ۽ عهديدارن ۽ ملازمن خلاف نڪتل ليٽر واپس وٺڻ ۽ 01 کان 04 گريڊ تائين ملازمن کي ڏنل وردي الائونس جيان باقي مستحق ملازمن کي به وردي الائونس ڏيڻ شامل آهن، انهن مسئلن جي حل لاءِ مسلسل يونيورسٽي انتظاميا سان ملاقاتون ڪيون ويون پر هن وقت تائين سواءِ آسرن ۽ دلاسن جي ڪو به عملي ڪم نه ڪيو ويو آهي. مٿي ڄاڻايل ملازمن جا جائز مسئلا جيڪڏهن تاريخ 06 آڪٽوبر 2026 بروز اڱارو تائين حل نه ڪيا ويا ته تاريخ 07 آڪٽوبر 2026 بروز اربع کان احتجاجي تحريڪ شروع ڪئي ويندي. هن وڌيڪ چيو ته هن مقصد لاءِ اليڪشن ۾ حصو وٺندڙ سڀني گروپن تي مشتمل 6 رڪني جوائنٽ ڪاميٽي جوڙي وئي آهي جيڪا احتجاجي تحريڪ جي اڳواڻي ڪندي جنهن ۾ سراج احمد ڀٽو، عبدالجبار چانڊيو، شڪيل احمد گهانگهرو، غلام مصطفيٰ اوڍو، مظفر علي گاڏهي ۽ ساجد علي ڀٽو شامل آهن، جڏهن ته يونيورسٽي ۾ ٽيچرس ۽ آفيسرس ايسوسيئيشن جي اڳواڻن سان جوائنٽ ايڪشن ڪاميٽي بابت سڀاڻي گڏجاڻي رکيل آهي، جنهن ۾ ٽيچرس، آفيسرس ۽ ملازمن جي مسئلن جي حل لاءِ گڏيل لائحه عمل جوڙيو ويندو. هن وائيس چانسلر ڊاڪٽر نيڪ محمد شيخ کي اپيل ڪندي چيو ته مادر علمي جي وسيع تر مفاد ۾ ٽيچرس، آفيسرس ۽ ملازمن جي تمام جائز ۽ قانوني مطالبن کي فوري طور تي حل ڪرڻ لاءِ پنهنجو اهم ڪردار ادا ڪن ته جيئن يونيورسٽي ۾ پکڙيل بيچيني ختم ٿئي ۽ اداري جو تعليمي ۽ انتظامي معيار وڌيڪ بهتر ٿي سگهي.