حيدرآباد ۾ سيپٽمبر دوران ورتل آخري ماحولياتي سيمپل پوليو وائرس لاءِ منفي آيا ،زين العابدين ميمڻ

حيدرآباد (رپورٽ علي غلام) ڊپٽي ڪمشنر حيدرآباد زين العابدين ميمڻ جي صدارت هيٺ نومبر مهيني ۾ منعقد ٿيندڙ پوليو کان بچاءُ واري مهم جي تيارين ۽ گذريل مهيني سيپٽمبر 2026 جي پوليو مهم جي ڪارڪردگي جو جائزو وٺڻ لاءِ ڊسٽرڪٽ پوليو ايريڊيڪيشن ڪميٽي ۽ پوليو مهم جو جائزا  اجلاس اڄ ڊي سي ڪامپليڪس حيدرآباد ۾ منعقد ٿيو اجلاس ۾ ايڊيشنل ڊپٽي ڪمشنر ٽو مهوش ٻرڙو ، ڊي ايڇ او هيلٿ حيدرآباد پير غلام حسين ، شراڪتدار  ادارن جي نمائندن ۽ لاڳاپيل کاتن جي عملدارن شرڪت ڪئي اجلاس ۾ پنجن سالن تائين جي ڄمار وارن سمورن ٻارن تائين پوليو ويڪسين جي رسائي کي يقيني بنائڻ، مهم جي موثر رٿابندي ۽ ادارن جو پاڻ ۾ ويجهي رابطي ۾ رهندي پوليو وائرس جي مڪمل خاتمي لاءِ گڏيل ڪوششن جي ضرورتن تي زور ڀريو ويو ان موقعي تي عالمي ادارا صحت جي نمائندي ۽ صحت کاتي جي عملدارن گذريل پوليو مهم جي ڪارڪردگي ، فيلڊ ۾ رهيل خامين ، مائيڪرو پلان، افرادي سگهه، سکيا ، ڪولڊ چين جي صورتحال ۽ ايندڙ مهم جي تيارين جي حوالي سان تفصيلي آگاهي ڏني وئي _اجلاس ۾ ٻڌايو ويو ته پوليو کان بچاءُ واري مهم 2 نومبر کان 8 نومبر 2026 تائين جاري رهندي جڏهن ته حيدرآباد ۾ سيپٽمبر دوران ورتل آخري ماحولياتي سيمپل پوليو وائرس لاءِ منفي آيا آهن دپٽي ڪمشنر زين العابدين ميمڻ  ماحولياتي نمونن جي منفي اچڻ کي مثبت اڳڀرائي قرار ڏيندي هدايت ڪئي ته گذريل مهم جي درپيش خامين جي نشاندهي ڪري انهن جو تدارڪ  ڪيو وڃي، هن خاص طور تي انڪاري ڪيسن، گهرن ۾ غير موجودگي جي ڪري ويڪسين کان محروم ۽ رهجي ويل ٻارن تي خصوصي ڌيان ڏيڻ جي هدايت ڪئي ۽ چيو ته انڪاري ڪيسن وارين يونين ڪونسلن ۾ ترجيحي  بنيادن تي موثر اپاءَ اختيار ڪيا وڃن ته جيئن ڪو به ٻار پوليو کان بچاءُ وارا ڦڙا پيئڻ کان محروم نه رهي  ان موقعي تي ڊسٽرڪٽ هيلٿ آفيسر حيدرآباد ڊاڪٽر پير غلام حسين پاران  ڪمزور ڪوريج وارن علائقن ۽ گهراڻن  جي نشاندهي ڪري فيلڊ ٽيمن جي تربيت ۾ سندن خامين کي دور ڪرڻ جي ضرورت تي زور ڀريو ويو اجلاس ۾ ڄاڻايو ويو ته ضلعي ۾ 544 انڪاري ٻار جڏهن ته 7,636 ٻارڙا گذريل مهم کانپوءِ غير موجود آهن، انهن ٻارن جي پروفائلنگ ۽ ٻيهر رسائي لاءِ پڻ جوڳا قدم کنيا پيا وڃن _ڊپٽي ڪمشنر حيدرآباد لاڳاپيل کاتن جي عملدارن کي هدايت ڪئي ته مائيڪرو پلانز، ٽيمن جي صلاحيت، ويڪسين جي معيار ، نگراني ۽ ڪوريج جي سمورن پهلوئن  کي بهتر بڻائيندي ايندڙ مهم جي تياريون مڪمل ڪيون وڃن ۽ سمورن پنجن سالن تائين جي ڄمار وارن ٻارن جي ويڪسينيشن کي يقني بڻائڻ لاءِ سمورا گهربل اپاءَ اختيار ڪيا وڃن.