سنڌ حڪومت پاران سکر ۾ ٽراما سينٽر جو قيام عوام لاءِ هڪ وڏو تحفو آهي، احمد علي قريشي

سکر (رپورٽ احمد علي): ريجنل ڊائريڪٽر صوبائي محتسبِ اعليٰ سنڌ، سکر ڊويزن احمد علي قريشي چيو آهي ته سنڌ حڪومت پاران شهيد بينظير ڀٽو ٽراما سينٽر سکر جو قيام عوام لاءِ هڪ وڏو تحفو آهي، جتي سکر، گهوٽڪي، خيرپور، شڪارپور ۽ ڀرپاسي وارن ٻين ضلعن ۾ پيش ايندڙ سنگين حادثن جي زخمين کي فوري طبي امداد فراهم ڪري قيمتي انساني جانيون بچايون پيون وڃن. اهڙن خيالن جو اظهار هن شهيد بينظير ڀٽو ٽراما سينٽر سکر جي دوري دوران ڪيو.دوري دوران ريجنل ڊائريڪٽر سينٽر جي ليبارٽري، دوائن جي اسٽور، استقباليه ڊيسڪ، فرسٽ ايڊ روم، الٽراسائونڊ روم، ايڪسري روم، آپريشن ٿيٽر ۽ مختلف وارڊن جو تفصيلي معائنو ڪيو. هن علاج هيٺ مريضن سان ملاقات ڪري کين فراهم ٿيندڙ طبي سهولتن ۽ علاج بابت معلومات حاصل ڪئي. هن مريضن کي بهتر طبي سهولتون فراهم ڪرڻ تي سينٽر جي انتظاميا، ڊاڪٽرن ۽ پيرا ميڊيڪل اسٽاف جي خدمتن کي ساراهيو.ان موقعي تي ٽراما سينٽر جي ايڊمنسٽريٽر ڊاڪٽر محمود قريشي ۽ ڊائريڪٽر ڊاڪٽر ذوالفقار سومرو بريفنگ ڏيندي ٻڌايو ته 50 بسترن تي ٻڌل هي ٽراما سينٽر جولاءِ 2026ع ۾ قائم ڪيو ويو آهي. هنن وڌيڪ ٻڌايو ته سينٽر ۾ حادثن جي زخمين کي ايڪسري، الٽراسائونڊ، ليبارٽري ٽيسٽ، آپريشن، ريڊيولاجي، سي ٽي اسڪين، وينٽيليٽر ۽ ٻيون ضروري طبي سهولتون مفت فراهم ڪيون وڃن ٿيون، جڏهن ته خانگي اسپتالن ۾ انهن سهولتن لاءِ مريضن کي وڏا خرچ برداشت ڪرڻا پئجي سگهن ٿا.هنن وڌيڪ ٻڌايو ته سينٽر کي صوبائي وزير صحت ڊاڪٽر عذرا فضل پيچوهو جي سرپرستي حاصل آهي ۽ انتظاميا جي پهرين ترجيح حادثن ۾ زخمي ٿيل ماڻهن کي بروقت طبي امداد فراهم ڪري سندن جانيون بچائڻ آهي.ان موقعي تي ڊاڪٽر محمود قريشي عوام جي آگاهي لاءِ پنهنجي پيغام ۾ چيو ته ٽراما سينٽر جو بنيادي مقصد سنگين حادثن ۾ زخمي ٿيل ماڻهن کي فوري طبي امداد فراهم ڪري سندن جانيون بچائڻ آهي. مريض جي حالت خطري کان ٻاهر ٿيڻ کان پوءِ، وڌيڪ علاج جي ضرورت موجب کيس سول اسپتال منتقل ڪيو ويندو آهي.هن وضاحت ڪندي چيو ته ٽراما سينٽر بنيادي طور تي هنگامي طبي امداد فراهم ڪرڻ ۽ مريض جي حالت کي مستحڪم ڪرڻ لاءِ قائم ڪيو ويو آهي، تنهن هوندي به ڪجهه مريض ابتدائي طبي امداد کان پوءِ به اتي ئي مڪمل علاج ڪرائڻ تي اصرار ڪندا آهن، جيڪو سينٽر جي بنيادي دائري ڪار ۾ شامل ناهي.دوري دوران ريجنل ڊائريڪٽر احمد علي قريشي سينٽر ۾ منعقد ڪيل آگاهي سيمينار ۾ پڻ شرڪت ڪئي. ان موقعي تي محتسب آفيس جو اسسٽنٽ سيد خضر عباس، ڊاڪٽر ۽ پيرا ميڊيڪل اسٽاف پڻ موجود هو.