گورنر راڄ ۾ حصو ۽ گورنرشپ نه ملڻ تي هڪ سياسي جماعت جو سربراهه ڏاڍو ڪاوڙيل آهي: محسن نقوي

لاهور (ويب ڊيسڪ) وفاقي گهرو وزير محسن نقوي چيو آهي ته گورنر راڄ ۾ حصو ۽ گورنرشپ نه ملڻ تي هڪ سياسي جماعت جو سربراهه سخت ناراض آهي.
لاهور ۾ صحافين سان غيررسمي ڳالهه ٻولهه ڪندي محسن نقوي چيو ته اهو ساڳيو سياستدان آهي، جيڪو ماضيءَ ۾ ڪيترن ئي ڏهاڪن تائين اسٽيبلشمينٽ جي سهاري سياست ڪندو رهيو.
هن چيو ته ان سياستدان جي حالت اها هئي، جو پنهنجي سياسي جماعت جون هوائي ٽڪيٽ به اسٽيبلشمينٽ کان ٺهرائيندو هو، اهڙن سياستدانن کي اڄ ٻين تي آڱريون کڻڻ نٿو سونهين. سياسي اختلاف پنهنجي جاءِ تي، پر غير اخلاقي ٻولي ۽ الزام بازي بدران دليلن ۽ حقيقتن جي بنياد تي ڳالهائڻ گهرجي.
محسن نقوي چيو ته ڪجهه سياسي اڳواڻن کي اڄ اڳوڻي فاٽا جي ضلعن جي وسيلن بابت وڏي ڳڻتي ٿي رهي آهي.
هن سوال ڪيو ته جڏهن ڪيترن سالن تائين انهن ضلعن کي سندن جائز حصو نه ملي رهيو هو، تڏهن اهي ماڻهو خاموش ڇو هئا؟ ان وقت کين اڳوڻي فاٽا جي عوام جي حقن لاءِ بيان ڏيڻ ڇو ياد نه آيو؟
گهرو وزير چيو ته اڳوڻي فاٽا جي عوام جي حقن ۽ وسيلن جو معاملو سياسي مفادن کان مٿانهون هجڻ گهرجي.
سندس چوڻ هو ته خيبرپختونخوا هن وقت سنگين سلامتيءَ جي چئلينجن کي منهن ڏئي رهيو آهي.
محسن نقوي سياسي اڳواڻن کي اپيل ڪئي ته باهه ڀڙڪائڻ ۽ ڏڦيڙ پکيڙڻ بدران امن امان جي بحالي ۽ دهشتگرديءَ جي خاتمي لاءِ پنهنجو ڪردار ادا ڪن.
هن چيو ته خيبرپختونخوا کي سياسي انتشار جي نه،پر امن، استحڪام ۽ گڏيل ڪوششن جي ضرورت آهي.