اٺن ڏهاڪن جو شاهڪار، ڀارت جي چنمي سُتر رنجِي ٽرافيءَ ۾ نئين تاريخ لکي ڇڏي

نئين دهلي (ويب ڊيسڪ) ميزورام جي 29 ورهين جي بيٽر چنمي سُتر ناگالينڊ خلاف رنجِي ٽرافيءَ جي پليٽ گروپ واري ميچ ۾ ناٽ آئوٽ 400 رنسون ٺاهي ڀارتي فرسٽ ڪلاس ڪرڪيٽ ۾ چوڻي سينچري ٺاهيندڙ ٻيو بيٽر بڻجي ويو آهي.
چنمي سُتر پنهنجي فرسٽ ڪلاس ڪيريئر جي رڳو ٻي ميچ ۾ اهو ڪارنامو انجام ڏنو. هن پرٿوي شا جي 379 رنسن جو اسڪور به پار ڪري رنجِي ٽرافيءَ جي تاريخ ۾ ٻي سڀ کان وڏي انفرادي اننگز کيڏي.
رنجِي ٽرافيءَ ۾ سڀ کان وڏي انفرادي اننگز جو رڪارڊ اڃا به ڀوساهيب نمبالڪر وٽ آهي، جنهن 1948-49ع ۾ مهاراشٽرا طرفان ڪاٺياواڙ خلاف ناٽ آئوٽ 443 رنسون ٺاهيون هيون.
سُتر چانهه جي وقفي تائين 392 رنسن تي ناٽ آئوٽ هو ۽ هن 155هين اوور ۾ 400 رنسون مڪمل ڪيون.
ان کانپوءِ ميزورام 9 وڪيٽن جي نقصان تي 581 رنسون ٺاهي اننگز ڊڪليئر ڪري ڇڏي.
سُتر ۽ لالريمپونيا چڪچواڪ وچ ۾ ڏهين وڪيٽ لاءِ ناٽ آئوٽ 189 رنسن جي ڀائيواري قائم ٿي، جيڪا رنجِي ٽرافيءَ جي تاريخ ۾ ڏهين وڪيٽ لاءِ ٽين وڏي ڀائيواري آهي.
رنجِي ٽرافيءَ ۾ ڏهين وڪيٽ جي سڀ کان وڏي ڀائيواريءَ جو رڪارڊ 233 رنسون آهي، جيڪو اجئه شرما ۽ منندر سنگهه 1991-92ع جي سيزن ۾ ممبئي خلاف دهلي طرفان کيڏندي قائم ڪيو هو.
سُتر جون 400 ناٽ آئوٽ رنسون فرسٽ ڪلاس ڪرڪيٽ جي تاريخ ۾ 400 يا ان کان وڌيڪ رنسن واري فهرست ۾ 12هين اننگز آهي.
فرسٽ ڪلاس جي تاريخ جي سڀ کان وڏي اننگز کيڏڻ جو اعزاز برائن لارا وٽ آهي، جنهن 501 ناٽ آئوٽ رنسون ٺاهيون هيون.
سُتر پهريون بيٽر آهي ، جنهن پنهنجي پهرين فرسٽ ڪلاس سينچريءَ کي چوڻي سينچريءَ ۾ بدلايو.
ان کان اڳ پهرين فرسٽ ڪلاس سينچريءَ جو سڀ کان وڏو اسڪور بهار جي ثاقب الغنيءَ جو 341 رنسون هو، جيڪو هن فيبروري 2022ع ۾ ميزورام خلاف ٺاهيو هو.
چنمي سُتر هن سال وجئه هزاري ٽرافيءَ ۾ ممبئي جي نمائندگي ڪئي هئي. جون ۾ هن ممبئي ٽي ٽوئنٽي ليگ ۾ ايم ايس سي مراٺا رائلز کي لڳاتار ٻيو ڀيرو ٽائيٽل کٽائڻ ۾ مدد ڪئي ۽ ٽورنامينٽ جي پڄاڻيءَ تي لڳاتار ٻن ففٽين سميت ڇهن اننگز ۾ 212 رنسون ٺاهيون، سندس اسٽرائيڪ ريٽ لڳ ڀڳ 120 رهيو هو.