ممبئي(ويب ڊيسڪ)بالي ووڊ جي نامور ۽ سينئر اداڪار سني ديول جي نئين ۽ سنسني خيز ڪرائم ٿرلر فلم ”سوريئا“ (Suryaa: Ant Se Aarambh Tak) جو باضابطا سرڪاري ٽيزر جاري ڪيو ويو آهي.
هيءَ فلم 2018ع ۾ ٺهيل مشهور ماليالم فلم ’جوزف‘ جو هندي ريميڪ آهي، جنهن ذريعي ڏکڻ هندستان جو معروف ڊائريڪٽر ايم پڌماڪمار بالي ووڊ ۾ پنهنجي ڊائريڪشن جي شروعات ڪري رهيو آهي.
فلم ۾ سني ديول هڪ ڏکايل پيءُ جو جاندار ڪردار ادا ڪري رهيو آهي، جيڪو پنهنجي ڌيءَ جي پراسرار موت کان پوءِ سچائي، انصاف ۽ طبي نظام ۾ ٿيندڙ بدعنوانين خلاف جنگ وڙهي ٿو. ٽيزر ۾ سني ديول جي سنجيده اداڪاري، پٺيان هلندڙ دمـدار ميوزڪ ۽ ڊائلاگن مداحن جا دل کٽي ورتا آهن.
هيءَ شاندار سسپينس سان ڀرپور فلم 20 نومبر 2026 تي سڄي دنيا جي سينما گهرن ۾ نمائش لاءِ پيش ڪئي ويندي.
فلم جي مرڪزي ڪاسٽ ۾ سني ديول سان گڏ مشهور اداڪار روِي ڪشن، پراگيا جيسوال، جِشو سينگپتا ۽ تينُو آندند پڻ اهم ڪردارن ۾ نظر ايندا. ايم ايم موويز جي بينر هيٺ ٺهندڙ هن فلم جا پروڊيوسر ڪمل مڪت، ديپڪ مڪت ۽ هيمانت مڪت آهن. ڏسندڙ ان فلم مان نيون اميدون جوڙي رهيا آهن، ڇاڪاڻ ته هيءَ سني ديول جو هڪ نئون ۽ سيريئس روپ سامهون آڻيندي.
