مشهور يوٽيوبر ايڊم دي وو 51 ورهين جي عمر ۾ وفات ڪري ويا.
غير ملڪي ميڊيا موجب، يوٽيوب جي شروعاتي ۽ مشهور ڪنٽينٽ ڪريئيٽرن مان شمار ٿيندڙ ڊيوڊ ايڊم وليمز، جيڪو ايڊم دي وو جي نالي سان مشهور هو، 51 ورهين جي عمر ۾ آمريڪا جي رياست فلوريڊا ۾ پنهنجي گهر ۾ مرده مليو.
اوسيولا ڪائونٽي شريف آفيس تصديق ڪئي آهي ته اٿارٽيز کي گهر سان ڪو رابطو نه هئڻ تي پريشاني ٿي، جنهن کانپوءِ ڪارروائي ڪئي وئي.
هڪ دوست سيڙهيءَ ذريعي گهر جي ٽئين منزل جي دريءَ مان اندر جھانڪيو، جتي ايڊم دي وو کي بستري تي پيل ڏٺو ويو. فائر ريسڪيو سان گڏ گهر ۾ داخل ٿيڻ تي انهن کي مرده قرار ڏنو ويو.
شريف آفيس موجب موت جي اصلي سبب معلوم ڪرڻ لاءِ ميڊيڪل ايگزامينر پاران پوسٽ مارٽم ڪئي ويندي.
ميڊيا رپورٽن مطابق، ڊيوڊ ايڊم وليمز 2009 ۾ يوٽيوب تي پنهنجو سفر شروع ڪيو، جڏهن ته 2012 ۾ هن پنهنجي مشهور چينل The Daily Woo لانچ ڪيو.
هن پنجن سالن تائين روزانو ولاگ ڪيا ۽ آمريڪا جي سڀني 50 رياستن جو سفر ڪيو. انهن جي ولاگز ۾ تفريحي پارڪ، ڀوت ڀريل گهر، ننڍا شهر ۽ منفرد هنڌن جون جھلڪيون شامل هيون.
ياد رهي ته ايڊم دي وو جو آخري ولاگ 21 ڊسمبر تي اپلوڊ ڪيو ويو، جنهن ۾ هن شهر جي ڪرسمس سينگار جو ٽور ڏيکاريو هو.
