آمريڪا ۾ ٿيل هڪ نئين سروي موجب، نئين نسل جا نوجوان اڳ جي ڀيٽ ۾ گهٽ خوش آهن ۽ مستقبل بابت وڌيڪ ڳڻتيءَ جو شڪار آهن. سروي ۾ 18 کان 29 ورهين جي عمر وارن 27 سيڪڙو نوجوانن جو ڊپريشن جو علاج هلي رهيو آهي، جيڪا 2019ع جي ڀيٽ ۾ 11 سيڪڙو وڌيڪ آهي.
سروي موجب، رڳو 44 سيڪڙو نوجوانن پنهنجي زندگيءَ کي خوشحاليءَ ڏانهن وڌندڙ قرار ڏنو، جڏهن ته 2010ع ۾ اها شرح 64 سيڪڙو هئي. نوجوانن دوستن ۽ جيون ساٿيءَ کان ڏوري، خوشيءَ ۾ گهٽتائي ۽ مستقبل بابت بي يقينيءَ جي شڪايت پڻ ڪئي. رڳو 31 سيڪڙو نوجوانن چيو ته اهي گذريل سال پنهنجا گهڻا مقصد حاصل ڪري سگهيا.
ماهرن موجب، نئين نسل کي سماجي رابطن جي ذريعن جي گهڻي استعمال، ڪورونا وبا ۽ رهائش جي وڌندڙ خرچن جهڙن مسئلن کي منهن ڏيڻو پيو آهي. نفسيات جي ماهر ڊاڪٽر ڪيٽرينا فيوري چيو ته نوجوانيءَ جي اهم دور ۾ وبا سبب ماڻهن سان ميل جول گهٽجڻ جا اثر ڊگهي عرصي تائين برقرار رهي سگهن ٿا.
سروي ۾ اهو پڻ سامهون آيو ته رڳو 47 سيڪڙو نوجوانن پنهنجن جيون ساٿين يا ويجهن دوستن سان لاڳاپن کي اڳ کان وڌيڪ مضبوط قرار ڏنو، جڏهن ته 2019ع ۾ اها شرح 65 سيڪڙو هئي. اهڙيءَ طرح، رڳو 64 سيڪڙو نوجوانن چيو ته انهن گذريل ڏينهن خوشي محسوس ڪئي، جيڪا 2019ع جي ڀيٽ ۾ 17 سيڪڙو گهٽ آهي.
سروي موجب، زندگيءَ مان گهٽ اطمينان جو لاڙو رڳو نئين نسل تائين محدود ناهي، پر 30 کان 44 ورهين جي عمر وارن ماڻهن ۾ پڻ اهڙي صورتحال ڏٺي وئي. ان جي ابتڙ، 65 ورهين يا ان کان وڏي عمر وارن ماڻهن ۾ زندگيءَ مان اطمينان جي شرح وڌي 53 سيڪڙو ٿي وئي.
ماهرن جو چوڻ آهي ته اهي انگ اکر نوجوانن جي ذهني صحت، سماجي لاڳاپن ۽ معاشي دٻاءَ بابت ڳڻتيءَ جوڳي صورتحال ظاهر ڪن ٿا، پر سروي مان اهو ثابت نٿو ٿئي ته ان جا ذميوار رڳو سماجي رابطن جا ذريعا، وبا يا مالي ڏکيائيون آهن.
