ڀارتي ٽي وي ۽ بالي ووڊ جي سينيئر اداڪارا انيتا ڪنول انڪشاف ڪيو آهي ته شوبز جي دنيا ۾ ڏهاڪن تائين ڪم ڪرڻ باوجود هاڻي کيس ڪم نٿو ملي ۽ هوءَ سخت مالي ڏکيائين کي منهن ڏئي رهي آهي.
72 ورهين جي اداڪارا يوٽيوب چئنل کي ڏنل هڪ انٽرويو ۾ ٻڌايو ته سندس گڏ ڪيل رقم ايندڙ هڪ سال اندر ختم ٿي ويندي، هوءَ معاشي طور پنهنجي ٻارن تي ڀاڙڻ نٿي چاهي.
انيتا ڪنول جو چوڻ هو ته کيس ڪمائي ڪرڻ جي ضرورت آهي، ڇاڪاڻ ته ٿي سگهي ٿو ته هوءَ اڃا 10 کان 20 سال وڌيڪ جيئري رهي، اهڙيءَ حالت ۾ هوءَ پنهنجي خرچن جو پورائو ڪيئن ڪندي؟
اداڪارا ٻڌايو ته هوءَ هڪ سهڻي گهر ۾ رهي ٿي، جنهن جو ڪجهه حصو سندس والدين ٺهرايو هو، جڏهن ته باقي اڏاوت لاءِ هن قرض ورتو هو، جيڪو هوءَ واپس ڪري چڪي آهي. هن چيو ته اهو گهر ئي سندس واحد ملڪيت آهي ۽ وٽس جيڪا ٿوري گهڻي بچت آهي، سا به هڪ سال اندر ختم ٿي ويندي، تنهنڪري کيس ڪم جي سخت ضرورت آهي، ڇاڪاڻ ته سندس پئسا تيزيءَ سان کٽي رهيا آهن.
هن وڌيڪ ٻڌايو ته جڏهن به هوءَ پنهنجي مالي حالتن بابت پريشان ٿيندي آهي ته سندس ٻار مٿس ڪاوڙبا آهن ۽ چوندا آهن ته جڏهن هو ساڻس گڏ آهن ته کيس ڪنهن به ڳالهه جي ڳڻتي ڪرڻ جي ضرورت ناهي.
تنهن هوندي به، انيتا ڪنول جو چوڻ هو ته انسان کي هميشه ٻين کان گهرڻ بدران ٻين جي مدد ڪرڻ جي ڪوشش ڪرڻ گهرجي.
هن چيو ته هوءَ زندگيءَ ۾ ڪڏهن به اهڙي حالت ۾ پهچڻ نٿي چاهي، جو کيس پنهنجن ٻارن کان پئسا گهرڻا پون، پر هوءَ اهڙي حيثيت ۾ رهڻ چاهي ٿي، جو پاڻ پنهنجي ٻارن جي مالي مدد ڪري سگهي.
