ڪراچي (28 جون 2026): ڪراچي ۾ دهشتگرد حملي دوران شهيد ٿيل پاڪستان رينجرز (سنڌ) جي اهلڪارن جي نماز جنازه ادا ڪئي وئي.
ڀارتي پراڪسي تنظيم جماعت الاحرار جي بزدلاڻي دهشتگرد حملي کي ناڪام بڻائيندي رينجرز جي جوانن شهادت جو اعزاز حاصل ڪيو. شهيدن جي نماز جنازه ۾ وفاقي گهرو وزير، سنڌ جو گورنر، سنڌ جو وڏو وزير، ڊي جي رينجرز، شهيدن جي وارثن سميت اعليٰ سول ۽ فوجي عملدارن وڏي انگ ۾ شرڪت ڪئي.
شرڪت ڪندڙن شهيدن جي عظيم قربانين کي ڀرپور خراج عقيدت پيش ڪيو ۽ سندن وارثن سان دلي همدردي ۽ تعزيت جو اظهار ڪيو.
ان موقعي تي وفاقي گهرو وزير محسن نقوي چيو ته دهشتگردي جو هي واقعو انتهائي افسوسناڪ آهي ۽ ان جو مڪمل حساب ورتو ويندو. هن چيو ته دهشتگردي ۾ ملوث عنصر جتي به هوندا، سيڪيورٽي فورسون انهن جو پيڇو ڪري کين انجام تائين پهچائينديون.
سنڌ جي گورنر نهال هاشمي چيو ته اسين دهشتگردي جي سخت لفظن ۾ مذمت ڪريون ٿا ۽ ملڪ مان ان جي مڪمل خاتمي لاءِ جدوجهد جاري رکنداسين. هن چيو ته ڀارت جي سرپرستي هيٺ ٿيندڙ دهشتگردي کي هرگز برداشت نه ڪيو ويندو ۽ دهشتگردي کي پاڙان پٽي ختم ڪيو ويندو.
سنڌ جي وڏي وزير مراد علي شاهه چيو ته رينجرز جي بهادر جوانن دهشتگردن جي ناپاڪ ارادن کي ناڪام بڻائيندي شهادت ماڻي، جن کي اسين سلام پيش ڪريون ٿا. هن چيو ته ملڪ مان دهشتگردي جي مڪمل خاتمي لاءِ سنڌ حڪومت سيڪيورٽي فورسن سان گڏ بيٺل آهي.
نماز جنازه کان پوءِ شهيدن جا جسد خاڪي سندن اباڻن علائقن ڏانهن روانا ڪيا ويا، جتي کين مڪمل فوجي اعزاز سان مٽيءَ ماءُ حوالي ڪيو ويندو.
نماز جنازه کان پوءِ وفاقي گهرو وزير محسن نقوي سنڌ جي گورنر سان گڏ ان هنڌ جو به دورو ڪيو، جتي دهشتگرد حملو ڪيو ويو هو.
