نامياري استاد ذوالفقار علي اعواڻ جي رٽائرمينٽ جي موقعي تي سندس اعزاز ۾ تقريب منعقد

سکر ( رپورٽ احمد علي) نامياري استاد ذوالفقار علي اعواڻ، هاءِ اسڪول ٽيچر گورنمينٽ (ن) اسلاميه هاءِ اسڪول باغِ حيات علي شاھ سکر، جي رٽائرمينٽ جي موقعي تي سندس اعزاز ۾ سکر جي هڪ مقامي هوٽل ۾ مانَ ۽ محبت ڀري تقريب منعقد ڪئي وئي . تقريب جو اهتمام محمد هارون هڪڙو، حاجي احمدالدين چاچڙ ۽ مشتاق علي لنڊ پاران ڪيو ويو. ان موقعي تي ذوالفقار علي اعواڻ کي گلن ۽ محبتن جا هار پارايا ويا، جڏهن ته اجرڪ جا تحفا پيش ڪري سندس علمي، تدريسي ۽ سماجي خدمتن کي ڀيٽا پيش ڪئي وئي. تقريب کي خطاب ڪندي مقررين چيو ته ذوالفقار علي اعواڻ پنهنجي سموري ملازمت دؤران تعليم ۽ تدريس جي شعبي ۾ محنت، خلوص، فرض شناسي ۽ ذميواريءَ سان پنهنجا فرض نڀايا آهن. سندس شخصيت محبت، سهڪار، سادگي ۽ ساٿين سان بهترين لاڳاپن جو خوبصورت مثال رهي آهي. هن پنهنجي پيشوراڻي زندگيءَ ۾ شاگردن جي تعليم ۽ تربيت سان گڏ سماجي حوالي سان به پنهنجو مثبت ڪردار ادا ڪيو، جيڪو هميشه ياد رکيو ويندو. ان موقعي تي ذوالفقار علي اعواڻ پنهنجي ساٿين ۽ تقريب جي منتظمين جا ٿورا مڃيندي چيو ته ساٿين پاران ڏنل هيءَ محبت، عزت ۽ خوبصورت ڀيٽا سندس لاءِ وڏو اعزاز آهي، جنهن کي هو هميشه ياد رکندو. تقريب جي پڄاڻيءَ تي سمورن ساٿين گڏجي مانجهاندو ڪيو ۽ هڪ ٻئي سان خوشگوار يادن ۽ محبتن جا پل ونڊيا.