سنڌ زرعي يونيورسٽي ۾ يوٿ اينڊ اسپورٽس پاليسي 2026ع بابت مشاورتي اجلاس، شاگردن جي ڀرپور شرڪت

ٽنڊوڄام (محبوب حسین بوزدار ںبیوروسندھ) سنڌ زرعي يونيورسٽي ٽنڊوڄام ۾ سنڌ يوٿ اينڊ اسپورٽس پاليسي 2026ع بابت صلاحڪاري ويھڪ منعقد ڪئي ويئي، جنهن ۾ يونيورسٽي جي شاگردن ۽ شاگردياڻين وڏي انگ ۾ شرڪت ڪندي تعليم، روزگار، ڪاروبار، راندين ۽ نوجوانن کي بااختيار بڻائڻ بابت پنهنجا ويچار توڙي ۽ تجويزون پيش ڪيون، اجلاس ۾ نوجوانن جي صلاحيتن کي اجاگر ڪرڻ، کين پاليسي جوڙڻ واري عمل ۾ شامل ڪرڻ ۽ صوبي جي سماجي ۽ معاشي ترقيءَ ۾ سندن ڪردار کي وڌيڪ اثرائتو بڻائڻ تي زور ڏنو ويو، ان موقعي تي اسٽوڊنٽس ٽيچرز انگيجمينٽ پروگرام (اسٽيپ) جي چيئرمين پروفيسر ڊاڪٽر محمد اسماعيل ڪنڀر چيو ته نوجوان سماجي تبديلي، معاشي ترقي، زرعي جدت ۽ پائيدار ترقيءَ جي بنيادي سگهه آهن، تنهنڪري پاليسي جوڙڻ ۽ فيصلا سازيءَ جي عمل ۾ سندن بامعنيٰ شرڪت لازمي آهي، هن چيو ته يونيورسٽين جي ذميواري آهي ته معياري تعليم، تحقيق، عملي تربيت ۽ قيادت جي صلاحيتن کي هٿي ڏئي نوجوانن کي مستقبل جي چئلينجن کي منهن ڏيڻ لاءِ تيار ڪن، هن خاص طور تي ٻهراڙيءَ جي نوجوانن لاءِ زرعي ڪاروبار، خوراڪ جي تحفظ، جديد زرعي طريقن ۽ روزگار جا پائيدار موقعا پيدا ڪرڻ جي ضرورت تي زور ڏيندي چيو ته نوجوانن کي رڳو ترقياتي پروگرامن مان فائدو حاصل ڪندڙ نه، پر جدت، قيادت ۽ فيصلا سازيءَ ۾ سرگرم ڪردار ادا ڪندڙ ڀائيوار طور تسليم ڪرڻ گهرجي. هن نوجوان عورتن، ٻهراڙيءَ جي آبادي ۽ گهٽ نمائندگي رکندڙ طبقن کي پڻ ترقياتي پروگرامن ۽ پاليسي جوڙڻ واري عمل ۾ اثرائتا موقعا فراهم ڪرڻ جي اهميت اجاگر ڪئي، اجلاس ۾ سنڌ يوٿ اينڊ اسپورٽس پاليسي 2026ع جي صلاحڪار خالد اسحاق پاليسي جي مقصدن ۽ اهم نڪتن تي روشني وجهندي ٻڌايو ته سنڌ حڪومت، سنڌ يوٿ پاليسي 2018ع جو جائزو وٺي نئين پاليسي جوڙي رهي آهي، جنهن لاءِ آبادي بابت گڏيل قومن جي اداري (يو اين ايف پي اي) پاران فني سهڪار فراهم ڪيو پيو وڃي. هن چيو ته نئين پاليسي کي نوجوانن جي حقيقي ضرورتن ۽ اميدن موجب بڻائڻ لاءِ شاگردن جا رايا، تجربا ۽ سفارشون شامل ڪرڻ ضروري آهن، صلاحڪاري اجلاس ۾ فني مهارتن جي واڌاري، نوجوانن جي قيادت، صحت ۽ ڀلائي، ڊجيٽل جدت، موسمياتي تبديلي، راندين جي سهولتن ۽ ٻهراڙيءَ جي نوجوانن کي بااختيار بڻائڻ سميت مختلف موضوعن تي خيالن جي ڏي وٺ ڪئي وئي. سوالن ۽ جوابن واري نشست ۾ شاگردن بيروزگاري، روزگار ۽ پيشورانه موقعن جي کوٽ، تعليمي نظام ۽ مارڪيٽ جي گهرجن ۾ فرق، توڙي نوجوانن جي شروع ڪيل منصوبن لاءِ ادارتي سهڪار وڌائڻ بابت پنهنجا مسئلا ۽ تجويزون پيش ڪيون، اجلاس جي پڄاڻيءَ تي يونيورسٽين، سرڪاري کاتن، ترقياتي ڀائيوارن ۽ نوجوانن جي تنظيمن وچ ۾ سهڪار وڌيڪ مضبوط بڻائڻ تي زور ڏنو ويو، ته جيئن شاگردن جا رايا ۽ سفارشون سنڌ يوٿ اينڊ اسپورٽس پاليسي 2026ع جي تياريءَ ۾ اثرائتي نموني شامل ڪري سگهجن.