اسلام آباد: (اڱارو: 31 مارچ 2026ع) ايران، آمريڪا جنگ جي معاشي اثرن سبب ڪمزور طبقن کي بچائڻ ۽ معاشري طور تي پوئتي پيل ماڻهن کي وڌ کان وڌ رليف ڏيڻ لاءِ سومر تي ايوان صدر ۾ اهم مشاورتي اجلاس ٿيو جنهن ۾ ملڪ کي پيش ايندڙ معاشي، توانائي ۽ سيڪيورٽي چيلنجز جو جائزو ورتو ويو.
سومر تي ايوان صدر ۾ اهم مشاورتي اجلاس ٿيو، صدر آصف علي زرداري جي صدارت هيٺ اجلاس ۾ وزيراعظم شهباز شريف، وفاقي وزير، چئني صوبن جا وڏا وزير، آزاد ڪشمير جو وزيراعظم، قومي سلامتي جو صلاحڪار ۽ سينئر اختياريون به موجود هيون.
اجلاس ۾ مهانگائي جي دٻاءُ ۾ عوام کي رليف ڏيڻ جي لاءِ هر ممڪن قدم کڻڻ جي هدايت ڏني وئي، تيل، گيس جي سپلاءِ تي دٻاءُ جي باوجود ايندهن جي دستيابي کي يقيني بنائڻ جو فيصلو ڪيو ويو ۽ پيٽروليم قيمتن ۾ اضافي جي تجويز کي رد ڪئي وئي.
ڪفايت شعاري پاليسي جي تحت سرڪاري خرچن ۾ نمايان گهٽتائي جي هدايت ڪئي وئي. ذريعن ٻڌايو ته اجلاس ۾ وفاق طرفان ٻه هفتيوار موڪلون، ڇنڇر ۽ آچر تي ملڪ گير سمارٽ لاڪ ڊائون جي تجويز تي غور ٿيو ته جيئن ملڪ ۾ تيل جي کهپت کي روڪي سگهجي پر انهي ۾ ڪجهه شرڪت ڪندڙن جي راءِ هئي ته اسمارٽ لاڪ ڊائون سبب پيداواري سرگرميون متاثر ٿينديون ۽ برآمدات تي منفر اثر پوندو، صوبن جي تجويز اسمارٽ لاڪ ڊائون جي تجويز تي عمل نه ڪرڻ جو فيصلو ڪيو.
اجلاس ۾ اها دلچسپ حقيقت به سامهون آئي ته تيل جي قيمتن ۾ اضافي جي باوجود ملڪ ۾ تيل جي کهپت ۾ 25 سيڪڙو اضافو ٿي ويو آهي جنهن تي اطلاعات واري وزارت کي چيو ويو ته بحراني ڪيفيت کي منهن ڏيڻ لاءِ عوامي شعور جي آگاهي لاءِ منظم مهم هلائي وڃي ته جيئن ماڻهو پنهنجو لائف اسٽائل تبديل ڪن. صدر آصف علي زرداري عوام کي پبلڪ ٽرانسپورٽ ۽ شيئرڊ موبيلٽي جي استعمال جي ترغيب ڏيڻ جي به هدايت ڏني. اجلاس ۾ خطي جي موجوده صورتحال جا پاڪستان جي معيشت ۽ فوڊ سيڪيورٽي تي اثرن جو تفصيلي جائزو ورتو ويو.
اجلاس ۾ چئني صوبن سان گڏوگڏ گلگت بلتستان ۽ آزاد جمون، ڪشمير جي حڪومتن جي طرفان قيمتن جي دٻاءُ کي ڪنٽرول ڪرڻ، ضروري سامان جي دستيابي کي يقيني بنائڻ ۽ عوام تي پوندڙ اثرن کي گهٽ ڪرڻ لاءِ کنيل قدمن کان آگاهه ڪيو ويو جنهن سبب هڪ مضبوط قومي رد عمل کي ممڪن بنائي سگهجي ٿو.
اجلاس ۾ يقين ڏياريو ويو ته عالمي بحران جي باوجود وقت تي فيصلن سبب ايندهن جي فراهمي ۾ ڪابه رنڊڪ نه آئي ۽ ملڪ جي ضرورتن کي پورو ڪرڻ جي لاءِ في الحال ايندهن جو وڏو ذخيرو موجود آهي جنهن جا مستقبل جي لاءِ به انتظام جاري آهن.
نائب وزيراعظم ۽ پرڏيهي وزير اجلاس کي حڪومت جي فعال سفارتي پهچ جي باري ۾ آگاهه ڪيو جنهن ۾ ترڪيه، سعودي عرب ۽ مصر جي قيادت سان گڏوگڏ تڪرار ۾ ملوث ماڻهن جي اڳواڻن سان انهن جون تازيون مصروفيتون به شامل آهن. اجلاس کي ٻڌايو ويو ته وزيراعظم طرفان تيل جي قيمتن ۾ اضافي جي تجويزن کي ڪيترائي ڀيرا رد ڪيو ويو آهي ۽ ڪفايت شعاري جي ذريعي بچايل فنڊز کي عوامي رليف کي استعمال ڪيو پيو وڃي.
هوڏانهن صدر آصف علي زرداري سان وزيراعظم شهباز شريف سومر تي ملاقات ڪئي جنهن ۾ نائب وزيراعظم اسحاق ڊار، اڳوڻي پرڏيهي وزير بلاول ڀٽو زرداري ۽ وفاقي گهرو وزير محسن نقوي کان علاوه قومي سلامتي جو صلاحڪار ليفتيننٽ جنرل عاصم ملڪ به موجود هو.
صدر آصف علي زرداري ۽ وزيراعظم شهباز شريف جي وچ ۾ ٿيل ملاقات ۾ قومي سلامتي ۽ گڏيل ملڪي صورتحال تي خيالن جي ڏي وٺ ڪئي وئي ۽ خطي جي تبديل ٿيندڙ صورتحال پاڪستان تي اثرن جو جائزو ورتو ويو.
