وزيراعظم شهباز شريف سان بنگلاديشي مذهبي معاملن واري صلاحڪار ملاقات ڪئي، جنهن ۾ ٻنهي ملڪن جي وچ ۾ اڏامن جي بحالي تي خيالن جي ڏي وٺ ڪئي وئي.
ميڊيا ونگ پي ايم هائوس طرفان جاري ڪيل بيان موجب وزيراعظم شهباز شريف سان بنگلاديش جي مذهبي معاملن واري صلاحڪار ڊاڪٽر اي ايف ايم خالد حسين جي ملاقات ٿي، انهي موقعي تي پاڪستان ۾ بنگلاديش جو هاءِ ڪمشنر محمد اقبال حسين خان به موجود هئا.
وزيراعظم ڊاڪٽر حسين ۽ انهي جي وفد جي آجيان ڪئي ۽ چيو ته پاڪستان ۽ بنگلاديش جي وچ ۾ بطرفي لاڳاپن، گڏيل تاريخ، ثقافتي رابطه ۽ گهري وابستگين تي ٻڌل آهن، عوامي رابطه، علمي ڏي وٺ، واپاري ۽ اقتصادي لاڳاپن سميت ٻطرفي لاڳاپن جي مثبت سمت تي اطمينان جو اظهار ڪندي وزيراعظم ٻنهي ملڪن جي وچ ۾ لاڳاپن کي هٿي ڏيڻ جي ضرورت تي زور ڏنو.
نيويارڪ ۽ قاهره ۾ ٿيل ملاقات جو ذڪر ڪندي وزيراعظم چيف ايڊوائزر پروفيسر محمد يونس جي دور انديش قيادت ۽ غربت جي خاتمي ۾ انهي جي ڪردار سان گڏوگڏ پاڪستان ۽ بنگلاديش جي لاڳاپن کي وڌيڪ مضبوط بنائڻ جي خواهش جي تعريف ڪئي.
ڊاڪٽر حسين پنهنجي آجيان تي وزيراعظم جو ٿورو ادا ڪيو ۽ چيو ته پاڪستان ۽ بنگلاديش جي وچ ۾ ڀائراڻن لاڳاپن تاريخي رابطن ۽ گڏيل عقيدي سان جڙيل آهن.
ڊاڪٽر حسين چيف ايڊوائزر پروفيسر محمد يونس جو هڪ خط به وزيراعظم جي حوالي ڪيو جنهن ۾ پاڪستان ۾ ٻوڏ سبب ٿيل جاني، مالي نقصان تي تعزيت جو اظهار ڪيو ويو ۽ امداد جي آڇ ڪئي وئي. ملاقات ۾ پاڪستان ۽ بنگلاديش جي وچ ۾ سڌو سنئون اڏامن جي جلد بحالي جي امڪانن تي به خيالن جي ڏي وٺ ڪئي.
وزيراعظم اميد ظاهر ڪئي ته ٻئي ملڪ ٻطرفي لاڳاپن ۾ موجوده رفتار کي برقرار رکڻ جي لاءِ اعليٰ سطح جا دورا جاري رکندا. انهي سلسلي ۾ وزيراعظم چيف ايڊوائزر کي پاڪستان جو سرڪاري دورو ڪرڻ جي دعوت جو ارادو ڪيو. بنگلاديشي صلاحڪار به وزيراعظم کي چيف ايڊوائزر ۽ حڪومت طرفان بنگلاديش جي دوري جي دعوت ڏني.
