سنڌ جي آبپاشي واري کاتي جي وزير ڄام خان شورو ڪوٽڙي بيراج جو دورو ڪيو، جتي هن ٻوڏ جي هاڻوڪي صورتحال کي نظر ۾ رکندي سنڌو درياهه ۽ بچاءَ بندن جائزو ورتو. ان موقعي تي سيڪريٽري آبپاشي ظريف اقبال کھيڙو، چيف انجنيئر ۽ ٻيا لاڳاپيل آفيسر به موجود هئا.
صوبائي وزير ڄام خان شورو جامشورو فرنٽ بند جو جديد ٿري ڊي ميپنگ ۽ جديد سسٽم ذريعي جائزو ورتو ته جيئن بند جي جوڙجڪ ۽ پاڻي جي وهڪري بابت گڏيل ڄاڻ حاصل ڪري سگهجي. چيف انجنيئر سنڌ درياءَ جي ڪوٽڙي بيراج تي ممڪن سيلابي حالتن بابت وزير کي تفصيلي بريفنگ ڏني. هن ٻڌايو 19 ۽ 20 سيپٽمبر دوران ڪوٽڙي بيراج تي 4 کان ساڍا 4 لک ڪيو سيڪ پاڻي پهچڻ جو امڪان آهي، جڏهن ته في الحال پاڻي جو وهڪرو لڳ ڀڳ 3 لک ڪيوسڪ آهي.
ان موقعي تي صوبائي وزير ڄام خان شورو چيو ته صورتحال تي سخت نگراني جاري آهي ۽ سمورا آفيسر الرٽ آهن، ڪوٽڙي بيراج تي موجوده وقت ۾ وچولي درجي جو ٻوڏ آهي پر ڪا به خطرو ناهي. هن چيو ته ماهرن مون کي ٻڌايو آهي ته جديد ٽيڪنالاجي مدد سان زمين جي پروفائلنگ ۽ ڪمپريشن جو درست ۽ جديد ڊيٽا حاصل ٿيندو، جنهن سان بند جي مضبوطائي ۽ پاڻي جي وهڪري جي انتظام ۾ وڌيڪ بھتري ايندي.
هن چيو ته سنڌ حڪومت ٻوڏ جي صورتحال کي منهن ڏيڻ لاءِ تيار آهي، جن ۾ بندن جي 24 ڪلاڪ نگراني، فوڪل پرسنز جي مقرري ۽ ريسڪيو ۽ رليف آپريشن شامل آهن. وزيراعليٰ سنڌ جي هدايتن تحت مختلف لاڳاپيل ادارن کي هدايتون ڏنل آهن ته هر ممڪن خطري کي اڳواٽ روڪيو وڃي. ڄام خان شورو عوام کي اعتماد ڏياريو ته سنڌ حڪومت ٻوڏ متاثر علائقن ۾ هر قسم جي مدد فراهم ڪرڻ لاءِ پرعزم آهي ۽ عوام جو تحفظ حڪومت جي پهرين ترجيح آهي.
