اوھان ڳوٺاڻا آهيو وڃي ڪاٺين تي ماني پچايو، سوئي سدرن گئس ڪمپني راڻيپور جي عملي جي نا انصافين خلاف ڳوٺ وزير جوڻيجو جي عورت جو سخت احتجاج

راڻيپور سچل سرمست ڀرسان ڳوٺ وزير جوڻيجو ۾ رهندڙ هڪ مظلوم عورت سوئي سدرن گئس ڪمپني (SSGC) جي مبينا ناانصافين ۽ غير ذميواراڻي روين خلاف سخت احتجاج رڪارڊ ڪرائيندي دانهيندي چيو آهي ته برساتن سبب زمين جي اندر لڳل گئس پائپ لائن ۾ ليڪيج پيدا ٿي وئي آهي، جنهن جي نتيجي ۾ سندس گئس جو بل غير معمولي حد تائين وڌي رهيو آهي۔
عورت جو چوڻ آهي ته هوءَ باقاعدگي سان گئس جا بل ادا ڪندي رهي آهي، پر پائپ لائن جي ليڪيج سبب گئس ضايع ٿي رهي آهي، جنهن جو ناجائز بار سندس مٿان وڌو پيو وڃي۔ هن وڌيڪ ٻڌايو ته بار بار سوئي سدرن گئس آفيس ۾ شڪايتون داخل ڪرائڻ باوجود نه ته پائپ لائن جي مرمت ڪئي وئي آهي ۽ نه ئي گئس بل ۾ ڪنهن به قسم جو رليف ڏنو ويو آهي، جيڪو سراسر ناانصافي آهي۔
متاثر عورت الزام لڳايو ته جڏهن هوءَ شڪايت لاءِ گئس آفيس وڃي ٿي ته اتي موجود عملو غير ذميواراڻو ۽ توهين آميز رويو اختيار ڪندي کيس اهو عجيب ۽ غير اخلاقي جواب ڏئي ٿو ته:
“اوھان ڳوٺاڻا آهيو، وڃي ڪاٺين تي ماني پچايو.”
عورت جو چوڻ آهي ته اهو جواب نه رڳو غير اخلاقي ۽ توهين آميز آهي، پر قانوني طور به غلط ۽ انساني حقن جي ڀڃڪڙي آهي۔
هن وڌيڪ چيو ته مقامي گئس آفيسر سعيد ميمڻ به هن معاملي ۾ ڪا به مدد نه ڪئي آهي ۽ بار بار اپيلن باوجود مسئلي کي نظرانداز ڪيو پيو وڃي۔ مظلوم عورت سوئي سدرن گئس ڪمپني جي چيئرمين ۽ ٻين بالا اختيارين کان مطالبو ڪيو آهي ته معاملي جو فوري نوٽس وٺي، پائپ لائن جي مرمت ڪرائي وڃي ۽ ناجائز طور تي وڌايل بلن ۾ رليف ڏنو وڃي۔
عورت خبردار ڪندي چيو ته جيڪڏهن جلد انصاف نه ڪيو ويو ته هوءَ مجبور ٿي سوئي سدرن گئس ڪمپني جي هيڊ آفيس آڏو احتجاج رڪارڊ ڪرائيندي، جڏهن ته اعليٰ اختيارين ۽ لاڳاپيل فورمن تي پڻ احتجاج جو حق استعمال ڪندي۔
علائقي جي سماجي حلقن ۽ شهري تنظيمن پڻ مطالبو ڪيو آهي ته سوئي سدرن گئس ڪمپني ڳوٺاڻن سان امتيازي سلوڪ بند ڪري، فني خرابين جي ذميواري قبول ڪري ۽ متاثر صارفين کي فوري رليف فراهم ڪري، جيئن غريب عوام کي وڌيڪ ذهني ۽ مالي پريشاني کان بچائي سگهجي۔