ايران ۾ آچر کان جاري مظاهرا هاڻي تشدد واري صورت اختيار ڪري چڪا آهن. ايران جي سرڪاري ميڊيا موجب مظاهرن دوران ايراني سيڪيورٽي فورس جو هڪ اهلڪار جان وڃائي ويٺو آهي۔
سرڪاري ٽيليويزن، صوبي لورستان جي نائب گورنر سعيد پورعلي جو حوالو ڏيندي ٻڌايو ته شهر ڪوههدشت سان تعلق رکندڙ بسيج جو 21 ورهين جو اهلڪار اربع جي رات هنگامو ڪندڙ ماڻهن هٿان مارجي ويو۔
هي آچر تي راڄڌاني تهران مان شروع ٿيل مظاهرن کان پوءِ پهرين سرڪاري طور تصديق ٿيل فوتگي آهي۔
بسيج هڪ رضاڪار پيراملٽري فورس آهي، جيڪا ايران جي پاسدارانِ انقلاب سان لاڳاپيل آهي۔
سعيد پورعلي موجب، ڪوههدشت ۾ مظاهرن دوران پٿراؤ جي واقعن ۾ 13 پوليس اهلڪار ۽ بسيج جا ميمبر زخمي به ٿيا آهن۔
ايران ۾ جاري مظاهرن جي شروعات تهران ۾ دڪاندارن طرفان مهانگائي ۽ معاشي جمود خلاف هڙتال سان ٿي هئي، جنهن کان پوءِ اهي ٻين شهرن تائين ڦهلجي ويا۔ اڱاري جي ڏينهن گهٽ ۾ گهٽ 10 يونيورسٽين جا شاگرد به احتجاج ۾ شامل ٿي ويا هئا۔
ايران جي صدر مسعود پزشڪيان به گذريل ڏينهن حڪومت کان معاشي حالتون بهتر بڻائڻ لاءِ قدم کڻڻ جو مطالبو ڪيو هو۔
هڪ تقريب کي خطاب ڪندي هن چيو: “اسلامي نقطه نظر کان جيڪڏهن اسين ماڻهن جي روزگار ۽ معاشي مسئلا حل نٿا ڪريون ته اسين جهنم ۾ وينداسين.”
