ايران ۾ جاري احتجاجي مظاهرا ملڪ جي 26 صوبن جي 78 شهرن تائين ڦهلجي ويا آهن، جتي مظاهرين ۽ سيڪيورٽي فورسز وچ ۾ جهيڙن دوران مارجي ويل ماڻهن جو انگ وڌي 19 ٿي ويو آهي۔
انساني حقن تي نظر رکندڙ خبر رساں اداري ايچ آر اي اين اي (HRANA) پنهنجي رپورٽ ۾ ٻڌايو آهي ته فائرنگ جي واقعن ۾ 50 کان وڌيڪ مظاهرين زخمي ٿيا آهن، جڏهن ته ايراني سيڪيورٽي فورسز 990 ماڻهن کي گرفتار ڪري ورتو آهي۔
ايچ آر اي اين اي موجب، سخت سيڪيورٽي انتظامن ۽ پوليس سميت ٻين سيڪيورٽي ادارن جي اضافي نفري مقرر هئڻ باوجود احتجاجي مظاهرا لڳاتار وڌندا پيا وڃن۔
رپورٽ ۾ چيو ويو آهي ته ايران ۾ جاري احتجاج هاڻي نائين ڏينهن ۾ داخل ٿي چڪا آهن، جڏهن ته يونيورسٽين جا شاگرد به احتجاجي سرگرمين ۾ ڀرپور شرڪت ڪري رهيا آهن۔
ايچ آر اي اين اي جو چوڻ آهي ته احتجاج کي گهٽ ڪرڻ لاءِ پوليس ۽ سيڪيورٽي فورسز فائرنگ، آنسو گيس جو استعمال ۽ وڏي پيماني تي گرفتاريون ڪيون آهن، جيئن احتجاج جي دائري کي وڌيڪ ڦهلجڻ کان روڪي سگهجي۔
ٻئي پاسي، حڪومت احتجاج جو دٻاءُ گهٽ ڪرڻ لاءِ عوام کي ايندڙ چار مهينن تائين هر مهيني 7 ڊالر الاؤنس ڏيڻ جو اعلان ڪيو آهي۔
ان دوران ايراني پارليامينٽ جي اسپيڪر محمد باقر قلي باف چيو آهي ته احتجاج ڪندڙن جي جائز مطالبن کي ضرور مڃڻ گهرجي، جڏهن ته هن اهو به چيو ته پرڏيهي ايجنٽن جي سازشن کي ناڪام بڻايو ويندو۔
