اسلام آباد: حڪومت گئس جي قيمتن ۾ اضافو نه ڪرڻ جو اعلان ڪري ڇڏيو آهي.
حڪومت گئس صارفين لاءِ خوشخبري ڏيندي اعلان ڪيو آهي ته ايندڙ 6 مهينن لاءِ گئس جي قيمتن ۾ ڪو به اضافو نه ٿيندو.
وفاقي وزير پئٽروليم علي پرويز ملڪ چيو آهي ته پهريون جنوري 2026 کان گئس جي قيمتن ۾ ڪو به اضافو نه ٿيندو.
هن وڌيڪ چيو ته گئس سيڪٽر ۾ سرڪلر ڊيٽ جو اضافو روڪيو ويو آهي ۽ نئون قرض پيدا نه ٿي رهيو آهي. قطر کان اضافي LNG ڪارگو عالمي مارڪيٽ ۾ منتقل ڪرڻ جو ڪامياب معاهدو ٿيو آهي. اصلاحات جي نتيجي ۾ سڀني صارفين لاءِ گئس جون قيمتون برقرار رهنديون.
علي پرويز ملڪ چيو ته وزيراعظم جي هدايت تي عوام کي سردي جي موسم ۾ وڌ کان وڌ ريليف فراهم ڪيو پيو وڃي ۽ ملڪ جي سڀني گهريلو صارفين کي گئس جي بهتر فراهمي جاري آهي. ڪو به مقامي گئس فيلڊ بند ناهي، جڏهن ته بجلي گهر IGC ڊيمانڊ کان وڌيڪ گئس وٺي رهيا آهن.
هن چيو ته SNGPL ۾ UFG نقصان 9٪ کان گهٽ ٿي ڪري 5٪ ٿي ويا آهن ۽ SSGC ۾ UFG نقصان 17٪ کان گهٽ ٿي ڪري 10٪ ٿي ويا آهن. گئس نيٽورڪ تي IoT مانيٽرنگ سسٽم فعال آهي ۽ پريشر ڊراپ تي سوئي ڪمپني فوري الرٽ ڏئي رهي آهي.
سوئي گئس ڪمپني جي ترجمان چيو ته گئس جي فراهمي جا اوقات صبح 5 وڳي کان رات 10 وڳي تائين وڌايا ويا آهن.
