بنگلاديش ڪرڪيٽ بورڊ (بي سي بي) انٽرنيشنل ڪرڪيٽ ڪائونسل (آءِ سي سي) سان رابطن بابت هڪ وضاحتي اعلاميو جاري ڪيو آهي۔
اعلاميي ۾ چيو ويو آهي ته آءِ سي سي طرفان جواب وصول ٿي چڪو آهي، جڏهن ته بي سي بي ڀارت ۾ ٿيندڙ ٽي ٽوئنٽي ورلڊ ڪپ ۾ شرڪت بابت پنهنجا خدشا ظاهر ڪيا هئا۔
بي سي بي موجب، بورڊ بنگلاديش جي ميچز کي ٻي هنڌ منتقل ڪرڻ جي به درخواست ڪئي هئي، جنهن جي جواب ۾ آءِ سي سي هن ڳالهه کي ورجايو آهي ته بنگلاديش ٽيم جي ورلڊ ڪپ ۾ شرڪت بنا ڪنهن رڪاوٽ جي يقيني بڻائي ويندي۔
اعلاميي ۾ چيو ويو آهي ته آءِ سي سي، بي سي بي سان گڏجي تحفظات بابت ڪم ڪرڻ تي رضامندي ظاهر ڪئي آهي ۽ بورڊ جي خدشن کي غور هيٺ آڻڻ تي پڻ اتفاق ڪيو ويو آهي۔
بي سي بي جو چوڻ آهي ته ميڊيا ۾ بنگلاديش ڪرڪيٽ بورڊ کي الٽيميٽم ڏيڻ بابت جيڪي خبرون گردش ڪري رهيون آهن، انهن ۾ ڪا به صداقت ناهي، اهي سڀ غلط خبرون آهن، ۽ آءِ سي سي جي ڪميونيڪيشن کي سياق ۽ سباق کان هٽي ڪري رپورٽ ڪيو ويو آهي۔
اعلاميي ۾ وڌيڪ چيو ويو آهي ته بنگلاديش ڪرڪيٽ بورڊ آءِ سي سي ۽ لاڳاپيل اختيارين سان تعميري انداز ۾ رابطا جاري رکندو۔
