لاهور: پاڪستان ڪرڪيٽ بورڊ (پي سي بي) قومي ڪرڪيٽ ٽيم جي رانديگرن جي ميچ فيس ۾ واڌ جي منظوري ڏئي ڇڏي آهي، جڏهن ته پاڪستان سپر ليگ (پي ايس ايل) جي 12هين ايڊيشن جي بجيٽ سميت ڪيترن ئي اهم منصوبن جي به منظوري ڏني وئي آهي.
پي سي بي چيئرمين محسن نقوي جي صدارت هيٺ بورڊ آف گورنرز جو اجلاس ٿيو، جنهن دوران مالي سال 2026-27 جي سرپلس بجيٽ جي متفقه طور منظوري ڏني وئي.
اجلاس ۾ فيصلو ڪيو ويو ته پاڪستان سپر ليگ کي انتظامي ۽ مالي لحاظ کان وڌيڪ خودمختيار بڻايو ويندو، جڏهن ته پي ايس ايل 12 جي بجيٽ جي به منظوري ڏني وئي. ان کان علاوه ملڪ ۾ ڊوميسٽڪ ڪرڪيٽ جي بجيٽ 3 ارب رپين مان وڌائي 4 ارب رپيا ڪرڻ جو به فيصلو ڪيو ويو.
چيئرمين محسن نقوي اجلاس دوران قومي رانديگرن لاءِ نئين سينٽرل ڪنٽريڪٽ جي فارميٽ، ادائيگي جي نئين نظام ۽ ميچ فيس ۾ واڌ جي به منظوري ڏني.
رانديگرن کي ڪيتري ميچ فيس ملندي؟
ذريعن موجب:
- ٽيسٽ ڪرڪيٽ کيڏندڙ رانديگرن کي في ميچ 15 لک رپيا ملندا.
- ون ڊي انٽرنيشنل رانديگرن جي ميچ فيس 6 لک 50 هزار رپيا مقرر ڪئي وئي آهي.
- ٽي ٽوئنٽي انٽرنيشنل رانديگرن کي في ميچ 4 لک 50 هزار رپيا ادا ڪيا ويندا.
ذريعن موجب اي ۽ بي ڪيٽيگري ۾ ٽيسٽ ۽ ون ڊي ڪرڪيٽ کيڏندڙ رانديگر شامل هوندا.
- اي ڪيٽيگري جي ٽيسٽ رانديگر کي 15 لک رپيا في ميچ ملندا.
- اي ڪيٽيگري جي ون ڊي رانديگر کي 7 لک 50 هزار رپيا في ميچ ادا ڪيا ويندا.
- اي ڪيٽيگري جي ٽي ٽوئنٽي رانديگر کي 6 لک 50 هزار رپيا في ميچ ملندا.
بي ڪيٽيگري ۾ شامل ون ڊي رانديگرن کي 7 لک 50 هزار رپيا ۽ ٽي ٽوئنٽي رانديگرن کي 5 لک رپيا في ميچ ڏنا ويندا.
سي ڪيٽيگري ۾ شامل رانديگر بنيادي طور ٽي ٽوئنٽي ڪرڪيٽ کيڏندا ۽ انهن جي ميچ فيس 5 لک رپيا هوندي. جيڪڏهن سي ڪيٽيگري جو ڪو رانديگر ون ڊي ميچ کيڏندو ته ان کي به 5 لک رپيا ئي ميچ فيس طور ملندا.
ڊوميسٽڪ ۽ عورتن جي ڪرڪيٽ لاءِ به اهم فيصلا
بورڊ آف گورنرز قائداعظم ٽرافي ۾ حصو وٺندڙ رانديگرن جي ميچ فيس 30 هزار رپين مان وڌائي هڪ لک رپيا ڪرڻ جي منظوري ڏني، جڏهن ته رزرو رانديگرن جي ميچ فيس 15 هزار رپين مان وڌائي 50 هزار رپيا ڪئي وئي.
اجلاس ۾ عورتن جي ون ڊي ۽ ٽي ٽوئنٽي ٽورنامينٽن جي انعقاد ۽ ان لاءِ گهربل فنڊز مختص ڪرڻ جي به منظوري ڏني وئي.
ان کان علاوه علائقائي گرائونڊ اسٽاف جي گهٽ ۾ گهٽ ماهوار پگهار 42 هزار رپيا مقرر ڪرڻ جو فيصلو پڻ ڪيو ويو.
انفراسٽرڪچر جي بهتري لاءِ اربين رپين جي منظوري
بورڊ آف گورنرز اجلاس ۾ ملڪ اندر 12 وڌيڪ ڪرڪيٽ گرائونڊز کي آپريشنل ڪرڻ ۽ نيشنل اسٽيڊيم سميت ٻين ڪرڪيٽ انفراسٽرڪچر جي اپ گريڊيشن لاءِ 6 ارب 70 ڪروڙ رپين جي منظوري ڏني.
ان سان گڏ هاءِ پرفارمنس سينٽر لاهور ۾ جديد بايو ميڪينڪس مشين لڳائڻ لاءِ به فنڊز مختص ڪرڻ جي منظوري ڏني وئي، جنهن سان رانديگرن جي فٽنيس، ٽيڪنيڪل صلاحيتن ۽ ڪارڪردگي کي وڌيڪ بهتر بڻائڻ ۾ مدد ملندي.
