آمريڪي صدر ڊونلڊ ٽرمپ اقوامِ متحده ۽ ٻين بين الاقوامي ادارن جي 66 تنظيمَن مان آمريڪا کي الڳ ڪرڻ ۽ انهن جي مالي معاونت ختم ڪرڻ جو اعلان ڪيو آهي.
ٽرمپ اربع ڏينهن چيو ته آمريڪا درجنين بين الاقوامي ۽ اقوامِ متحده سان لاڳاپيل ادارن مان دستبردار ٿي ويندو، جن ۾ هڪ اهم موسمياتي معاهدو ۽ اقوامِ متحده جو اهو ادارو به شامل آهي جيڪو صنفي برابري ۽ عورتن کي بااختيار بڻائڻ لاءِ ڪم ڪري ٿو. ٽرمپ موجب اهي ادارا آمريڪي قومي مفادن جي خلاف ڪم ڪن ٿا.
آمريڪا اقوامِ متحده جي عورتن واري اداري UN Women کان به الڳ ٿي رهيو آهي، جيڪو صنفي برابري ۽ عورتن جي بااختياري لاءِ ڪم ڪري ٿو. ان کان علاوه آمريڪا اقوامِ متحده جي آبادي فنڊ UNFPA کان به دستبردار ٿي رهيو آهي، جيڪو 150 کان وڌيڪ ملڪن ۾ خانداني منصوبه بندي سان گڏ ماءُ ۽ ٻار جي صحت تي ڌيان ڏئي ٿو. آمريڪا گذريل سال ئي UNFPA جي فنڊنگ گهٽائي ڇڏي هئي.
وائيٽ هائوس طرفان جاري ڪيل فهرست موجب 35 اهڙا ادارا به شامل آهن جيڪي سڌي طرح اقوامِ متحده جو حصو ناهن. انهن ۾ بين الاقوامي پينل براءِ موسمياتي تبديلي IPCC، نيشنل انسٽي ٽيوٽ فار ڊيموڪريسي اينڊ اليڪٽرول اسسٽنس، ۽ انٽرنيشنل يونين فار ڪنزرويشن آف نيچر نمايان آهن.
وائيٽ هائوس جو چوڻ آهي ته آمريڪا 31 اقوامِ متحده جي ادارن مان به الڳ ٿي رهيو آهي، جن ۾ اقوامِ متحده جو مرڪزي موسمياتي معاهدو UNFCCC، اقوامِ متحده ڊيموڪريسي فنڊ، ۽ ماءُ ٻار جي صحت تي ڪم ڪندڙ اهم ادارو UNFPA شامل آهن. آمريڪا گذريل سال ٽن ڏهاڪن ۾ پهريون ڀيرو اقوامِ متحده جي سالياني عالمي موسمياتي اجلاس ۾ شرڪت نه ڪئي هئي.
برطانوي خبر ايجنسي موجب ٽرمپ جو هي قدم ڪثيرالجہتي ادارن، خاص طور تي اقوامِ متحده بابت، سندس پراڻي بي اعتمادي جي عڪاسي ڪري ٿو. هو بار بار بين الاقوامي ادارن جي افاديت، خرچن ۽ احتساب تي سوال اٿاريندو رهيو آهي ۽ اهو موقف اختيار ڪندو رهيو آهي ته اهي اڪثر آمريڪي مفادن جي خدمت ڪرڻ ۾ ناڪام رهن ٿا.
اقوامِ متحده طرفان هن اعلان تي اڄ باضابطه ردعمل اچڻ جي اميد آهي. گذريل سال جنوري ۾ ٻي مدتِ صدارت شروع ٿيڻ کان پوءِ ٽرمپ آمريڪا کي اڳ ئي عالمي ادارو صحت، پيرس موسمياتي معاهدي ۽ اقوامِ متحده جي انساني حقن واري ڪائونسل مان ڪڍي چڪا آهن.
