تفصيل موجب، جمعيت علماء اسلام صوبي سنڌ جي قائم مقام سيڪريٽري جنرل مولانا محمد صالح اندڙ سکر ۾ امن امان جي خراب ٿيندڙ صورتحال تي شديد تشويش جو اظهار ڪندي چيو آهي ته ضلعي انتظاميه ۽ پوليس شهري ماڻهن جي جان ۽ ملڪيت جي حفاظت ۾ مڪمل طور تي ناڪام ٿي چڪي آهي.
انهن خيالن جو اظهار هنن آر ڊي 86 صالح پٽ ۾ “امن بحال ڪيو” تحريڪ تحت منعقد ٿيل احتجاجي مظاهري کي خطاب ڪندي ڪيو. هنن چيو ته شهر ۾ جرمن ۾ مسلسل واڌارو ٿي رهيو آهي ۽ عوام خوف ۽ عدم تحفظ جو شڪار آهن. بيگناه ڇوڪري پريا ڪماري جي اغوا جو ڊگهو وقت گذرڻ باوجود اڃا تائين ڪا پيش رفت نه ٿيڻ نهايت افسوسناڪ آهي.
وڌيڪ تشويشناڪ ڳالهه اها آهي ته پوليس پاران اهو موقف اختيار ڪيو پيو وڃي ته سکر ۾ اغوا جو ڪو ڪيس ئي موجود ناهي، جيڪو زميني حقيقتن جي بلڪل برعڪس آهي ۽ عوام سان مذاق جي مترادف آهي. هنن سوال اٿاريو ته جيڪڏهن اغوا جو ڪو ڪيس ناهي ته پوءِ پريا ڪماري ڪٿي آهي؟
مولانا محمد صالح اندڙ مطالبو ڪيو ته پريا ڪماري جي بحالي سان گڏوگڏ امن امان جي بحالي ۽ عوام جي جان ۽ ملڪيت جي حفاظت لاءِ هنگامي بنيادن تي مؤثر قدم کنيا وڃن.
احتجاجي مظاهري ۾ جمعيت علماء اسلام ضلع سکر جا جنرل سيڪريٽري حافظ عبد الحميد مهر، مولانا اسدالله ڀيو، مولانا محمد خان شنٻاني، مولانا عبدالوهاب مهر، فرزان علي پنھور، اختيار حسين پنھور شرڪت ڪئي، جڏهن ته شيعه علماء ڪائونسل جا امداد الحسيني، شهيد دودو سومرو جا ضلعي صدر، غازي ڊنو سومرو، آفتاب شنٻاني ۽ وڏي انگ ۾ ڪارڪن ۽ ذميوار به احتجاج ۾ شرڪت ڪئي.
مقررن اظهار ڪيو ته جڏهن تائين سکر ۾ امن امان بحال نه ٿئي ۽ بيگناه ڇوڪري کي بحال نه ڪيو وڃي، تڏهن تائين احتجاجي تحريڪ جاري رکيو ويندو.
