پاڪستان قومي ٽيم کي ٽي 20 ورلڊڪپ ۾ شرڪت جي اجازت ته ڏئي ڇڏي آهي، پر بنگلاديش سان همدردي طور، پاڪستاني ٽيم 15 فيبروري تي ڀارت خلاف شيڊول ٿيل ميچ ۾ ميدان ۾ نه اترندي ۽ مقابلي جو بائيڪاٽ ڪندي، جنهن سبب ڀارتي براڊڪاسٽرز کي وڏو مالي نقصان ٿيڻ جو خدشو آهي.
پاڪ-ڀارت ڪرڪيٽ ميچ دنيا جو سڀ کان وڏو راندين جو مقابلو سمجهيو ويندو آهي. رپورٽ موجب، پاڪستان جي ڀارت خلاف ميچ نه کيڏڻ سبب ڀارتي براڊڪاسٽرز کي لڳ ڀڳ 500 ملين ڊالر (141 ارب روپيا) جو نقصان ٿيڻ جو خدشو آهي، جڏهن ته ميچ جي گيٽ مني مان آءِ سي سي کي لکين ڊالرن جو نقصان ٿيڻ جو امڪان آهي.
محتاط اندازي موجب، ٽي 20 ورلڊڪپ مان ٿيندڙ آمدني جو اڌ حصو صرف پاڪ-ڀارت ميچ مان حاصل ٿيندو آهي.
پاڪستان کي هر سال آءِ سي سي کان 35 ملين ڊالر جو شيئر ملندو آهي. براڊڪاسٽرز جي نقصان سبب پي سي بي کي آءِ سي سي پاران قانوني چارا جوئي سان پڻ منهن ڏيڻو پئجي سگهي ٿو.
ڀارت خلاف ميچ نه کيڏڻ جي باوجود، پاڪستان جا ٻئي رائونڊ ۾ ڪواليفاءِ ڪرڻ جا امڪان روشن آهن.
حڪومتي ذريعن موجب، ڀارت خلاف ميچ بائيڪاٽ جي مرڪزي سبب آءِ سي سي جو بنگلاديش بابت جانبدارانه فيصلو آهي. آءِ سي سي چيئرمين جے شاهه پنهنجي جانبدارانه فيصلن سان انٽرنيشنل ڪرڪيٽ ڪائونسل کي انڊين ڪرڪيٽ ڪائونسل بڻائي ڇڏيو آهي.
واضح رهي ته بنگلاديش ڪرڪيٽ بورڊ 7 فيبروري کان ڀارت ۽ سري لنڪا ۾ شروع ٿيندڙ ٽي 20 ورلڊڪپ دوران سيڪيورٽي خدشن جي بنياد تي پنهنجي ٽيم ڀارت موڪلڻ کان انڪار ڪيو، جنهن کان پوءِ پاڪستان بنگلاديش جي موقف جي حمايت ڪئي.
پر آءِ سي سي بنگلاديش ڪرڪيٽ بورڊ جي موقف کي تسليم نه ڪيو ۽ بنگلاديش جي جاءِ تي اسڪاٽ لينڊ کي ٽي 20 ورلڊڪپ 2026 جو حصو بڻايو. آءِ سي سي جي ڀارت نواز پاليسين ۽ بنگلاديش کي ٽورنامنٽ مان ٻاهر ڪڍڻ سبب پاڪستان سخت موقف اختيار ڪيو آهي.
