آمريڪي مڊٽرم چونڊن ۾ ٽرمپ افيڪٽ جو فائدو ڪنهن کي ٿيندو؟ ڊاڪٽر لالاني ٻڌائي ڇڏيو

آمريڪي رياست ٽيڪساس جي اسيمبلي جي ميمبر ڊاڪٽر سليمان لالاني چيو آهي ته وچ مدتي (مڊٽرم) چونڊن ۾ ٽرمپ افيڪٽ جو فائدو ڊيموڪريٽس کي ٿيندو۔

ڊاڪٽر سليمان لالاني اها ڳالهه جيو نيوز کي ڏنل انٽرويو ۾ ڪئي۔ هن دعويٰ ڪئي ته صدر ڊونلڊ ٽرمپ جي قدمن سبب آمريڪي شهرين جي اڪثريت بيزار ٿي رهي آهي۔

ڊاڪٽر سليمان لالاني آمريڪي رياست ٽيڪساس جي ڊسٽرڪٽ 76 مان اسيمبلي ميمبر آهن۔ سندن عهدي جي مدت 12 جنوري 2027 تي ختم ٿيندي۔

آمريڪن پاڪستاني ڊاڪٽر، وڪيل ۽ سياستدان ڊاڪٽر لالاني ٽين ڀيرو رياستي اسيمبلي جي چونڊ وڙهي رهيا آهن۔ هن ڀيري به هو ساڳئي حلقې جي نمائندگي جا خواهشمند آهن۔ سندن ڊيموڪريٽڪ پرائمري چونڊ هن سال 3 مارچ تي ٿيندي۔

ڊاڪٽر لالاني چيو ته اميگريشن هجي، بارڊر سيڪيورٽي هجي يا معيشت، هر جاءِ تي ريپبلڪنز جو گراف هيٺ اچي رهيو آهي۔

ڊيموڪريٽڪ اڳواڻ موجب اميگرينٽ ڪميونٽي آمريڪي اميگريشن اينڊ ڪسٽمز انفورسمنٽ اداري، جنهن کي مختصر طور “آئس” چيو وڃي ٿو، ان کان تمام گهڻي تنگ آهي۔

ڊاڪٽر لالاني چيو ته دنيا جي مختلف ملڪن تي لاڳو ڪيل ٽيرف هجن، وينزويلا خلاف ڪارروائي هجي يا ٻين ملڪن سان لاڳاپيل قدم، اهي سڀ آمريڪي عوام جي ڌيان کي هٽائڻ جون ڪوششون آهن۔

ريپبلڪن پارٽي سان تعلق رکندڙ صدر ڊونلڊ ٽرمپ ڪجهه هفتا اڳ پنهنجي پارٽي جي اميدوارن ۽ ٻين اڳواڻن تي زور ڏنو هو ته هو متحد رهن ۽ سٺن ڪمن بابت عوام کي آگاهه ڪن، ڇو ته روايت اها آهي ته جيڪڏهن صدر ريپبلڪن پارٽي مان هجي ته مڊٽرم چونڊون اڪثر ڊيموڪريٽس کٽيندا آهن۔

صدر ٽرمپ ساڳئي وقت اهو خطرو به ظاهر ڪيو هو ته جيڪڏهن مڊٽرم چونڊن ۾ ڊيموڪريٽس ڪامياب ٿيا ته هو صدر جو مواخذو ڪرڻ جي ڪوشش ڪندا۔

ڊيموڪريٽڪ اڳواڻ ڊاڪٽر لالاني دعويٰ ڪئي ته حقيقت اها آهي ته ريپبلڪنز کي هاڻي احساس ٿي ويو آهي ته هو آزادي سان مڊٽرم چونڊون کٽي نٿا سگهن۔

نومبر ۾ ٿيندڙ وچ مدتي چونڊن بابت ڊاڪٽر لالاني چيو ته جيڪڏهن ڊيموڪريٽس هدف تي ڌيان رکيو ۽ ووٽر ٽرن آئوٽ سٺو رهيو ته ڊيموڪريٽڪ اميدوارن جي ڪاميابي جا واضح امڪان آهن۔

ڊاڪٽر لالاني مختصر دوري تي پنهنجي شهر ڪراچي آيا آهن، جتي هنن هڪ مقامي يونيورسٽي ۾ ليڪچر ڏنو ۽ زور ڏنو ته شاگردن کي پبلڪ پاليسي ۽ سياسي شموليت بابت آگاهي ڏيڻ گهرجي۔

ڊاڪٽر لالاني جو چوڻ هو ته ٻاهر ويهي تنقيد ڪرڻ سان نظام نٿو بدلي۔ جيڪڏهن نوجوان نسل سماج کي سڌارڻ چاهي ٿي ته ان کي پاڻ عملي ڪردار ادا ڪرڻو پوندو، پر ان کان اڳ پنهنجي حقن جي سٺي ڄاڻ هئڻ لازمي آهي۔