اسلام آباد: (اڱارو: 15 سيپٽمبر 2026ع) وزيراعظم شهباز شريف سموري ملڪ ۾ تيز برساتن ۽ امڪاني ٻوڏ کي نظر ۾ رکندي سمورن ادارن کي تيار رهڻ جي هدايت ڪري ڇڏي آهي.
نيشنل ڊيزاسٽر مينجمينٽ اٿارٽي(اين ڊي ايم اي) جي چيئرمين ليفٽيننٽ جنرل انعام حيدر ملڪ وزيراعظم شهباز شريف سان ملاقات ڪئي ۽ تازو سانوڻي ۾ تيز برساتن ۽ امڪاني ٻوڏ صورتحال کي منهن ڏيڻ جي اڳواٽ انتظامن تي بريفنگ ڏني.
وزيراعظم انهي موقعي تي هدايت ڪئي ته برسات سبب متاثر علائقن ۾ عوام کي هر ممڪن امداد ۽ رليف ڏيڻ جي لاءِ سمورا دستياب وسيلا ڪتب آندا وڃن. هن برساتن جي دوران روڊن ۽ پلن تي ٽريفڪ جي روانگي يقيني بنائڻ ۽ امدادي سامان جي روهاست لاءِ لاڳاپيل کاتن سان رابطا وڌائڻ جي به هدايت ڪئي.
وزيراعظم شهباز شريف اين ڊي ايم اي کي لاڳاپيل صوبائي ادارن ۽ صوبائي ڊيزاسٽر مينجمينٽ اٿارٽيز سان موثر رابطو رکڻ جي هدايت جاري ڪئي. ملاقات ۾ چيئرمين اين ڊي ايم اي ٻڌايو ته وزيراعظم جي هدايت تي ڪيل اڳواٽ انتظامن سبب لاڳاپيل ادارا انهي سانوڻي سيزن جي بهتر قدمن سان بهتر انداز ۾ نگراني ڪري سگهن.
ليفٽيننٽ جنرل انعام حيدر ملڪ وزيراعظم کي جاري سانوڻي سيزن جي امڪاني رجحان ۽ صوبن ادارن جي گڏيل تعاون سان جاري گڏيل انتظامن جي صورتحال کان به آگاهه ڪيو. بريفنگ ۾ وڌيڪ ٻڌايو ويو ته ملڪ جي ڪنڊ ڪڙڇ ۾ ڪنهن به هنگامي موسمي صورتحال کي نظر ۾ رکندي سمورا لاڳاپيل ادارا ريسڪيو ۽ رليف جي لاءِ تيار آهن.
