سکر (بيورو رپورٽ): سکر جي تعلقي پنو عاقل جي ڳوٺ باغ پئي جي رهواسي ڪلهوڙو برادري جي ماڻهن مبينا طور گهر تي قبضي، اچ وڃ جو رستو بند ڪرڻ ۽ پوليس جي عدم ڪارروائي خلاف سکر پريس ڪلب آڏو احتجاج ڪندي انصاف ۽ تحفظ فراهم ڪرڻ جو مطالبو ڪيو.
احتجاج ۾ عبدالغفار ڪلهوڙو، سندس گهرواري مائي جاويدان ڪلهوڙو، معصوم ٻار ۽ پٽ نصيب الله ڪلهوڙو ۽ نجيب الله ڪلهوڙو شرڪت ڪئي.
ان موقعي تي متاثر ڌر ميڊيا سان ڳالهائيندي الزام هنيو ته عجيب ڪلهوڙو پنهنجي ساٿين سميت سندن گهر تي ناجائز قبضو ڪري ورتو آهي، جڏهن ته ناليون ڀري سندن اچ وڃ جو واحد رستو پڻ بند ڪري ڇڏيو آهي، جنهن سبب کين سخت مشڪلاتن کي منهن ڏيڻو پئجي رهيو آهي.
متاثر ڌر جو چوڻ هو ته هنن ان معاملي بابت ڪيترائي ڀيرا پوليس کي درخواستون ڏنيون آهن، پر اڃا تائين ڪا به مؤثر ڪارروائي عمل ۾ نه آندي وئي آهي. سندن موجب پوليس جي بي حسي ۽ مبينا جانبداري سبب سندن جان ۽ مال کي سخت خطرا لاحق ٿي ويا آهن.
هنن وڌيڪ الزام هنيو ته لاڳاپيل ٿاڻي جو ايس ايڇ او سانگي مبينا طور جوابدار ڌر جي سرپرستي ڪري رهيو آهي، جنهن ڪري بااثر جوابدار کين ڌمڪيون ڏئي رهيا آهن ۽ ڪنهن به وقت کين نقصان پهچائي سگهن ٿا.
احتجاج ڪندڙن آءِ جي سنڌ، ڊي آءِ جي سکر، ايس ايس پي سکر، ڊپٽي ڪمشنر سکر ۽ ٻين لاڳاپيل اختيارين کان مطالبو ڪيو ته واقعي جو فوري نوٽيس وٺي جوابدارن خلاف قانوني ڪارروائي ڪئي وڃي، ناجائز قبضو ختم ڪرايو وڃي ۽ متاثر خاندان کي انصاف سان گڏ مڪمل تحفظ فراهم ڪيو وڃي.
