اسسٽنٽ ڪمشنر عمامه سولنگي جي اڳواڻي ۾ غير قانوني ڪاروبار خلاف وڏو ڪريڪ ڊائون
ايڪسائيز، ضلعي انتظاميه ۽ پوليس جي گڏيل ڪارروائي ۾ غير قانوني تمباڪو جي وڏي مقدار ضبط.
خيرپور ميرس: اسسٽنٽ ڪمشنر خيرپور عمامه سولنگي غير قانوني ڪاروبار جي خاتمي لاءِ ڀرپور قدم کنيا ۽ مختلف ادارن جي آفيسرن سان گڏ خيرپور جي مختلف علائقن ٺيڙهي مارڪيٽ ۽ اُڀڙي ۾ گڏيل ڪارروائي ڪئي۔ هن ڪارروائي دوران ايڪسائيز اينڊ ٽيڪسيشن ڊپارٽمينٽ جي آفيسر اي ٽي او نعيم الله گھوٽو، ايڊيشنل ڊائريڪٽر نارڪوٽڪس نعمان قريشي، اسسٽنٽ مختيارڪار خيرپور شيراز ڦلپوٽو ۽ پوليس جي وڏي نفري غير ڪسٽم پيڊ تمباڪو جا پيڪٽ هٿ ڪيا. اسسٽنٽ ڪمشنر ۽ ٻين عملدارن موقعي تي ئي غير قانوني شين کي ضبط ڪندي ملوث ماڻهن خلاف سخت قانوني ڪارروائي جو لڪم ڏنو۔ اسسٽنٽ ڪمشنر عمامه سولنگي واضح ڪيو ته حڪومت جي هدايتن موجب غير قانوني ۽ ممنوعه شين جي وڪري کي هرگز برداشت نه ڪيو ويندو۔ هن چيو ته عوامي صحت ۽ قومي خزاني کي نقصان پهچائيندڙ عنصرن خلاف بنا امتياز ڪارروائيون جاري رهنديون۔ هن وڌيڪ چيو ته ضلعي انتظاميه قانون جي عملداري کي يقيني بڻائڻ ۽ غير قانوني سرگرمين جي مڪمل خاتمي لاءِ هر ممڪن قدم کڻي رهي آهي جڏهن ته شهرين کي پڻ اپيل ڪئي وئي ته اهڙن عنصرن جي نشاندهي ڪن ته جيئن بروقت ڪارروائي ممڪن بڻائي سگهجي۔ ضلعي انتظاميه واضح ڪيو ته خيرپور ۾ قانون جي بالادستي کي ڪنهن به حال ۾ برقرار رکڻ لاءِ سخت قدم کنيا ويندا ۽ ڪنهن کي به غير قانوني ڪاروبار جي اجازت نه ڏني ويندي
