آمريڪي نائب صدر جي ڊي وينس چيو آهي ته آمريڪا ايران کي هڪ حتمي ۽ بهترين آفر پيش ڪئي، پر ايران ان کي قبول ڪرڻ کان انڪار ڪري ڇڏيو، جنهن سبب ٻنهي ملڪن وچ ۾ ڪو به حتمي معاهدو طئي نه ٿي سگهيو.
اسلام آباد ۾ ايران سان ڳالهين کانپوءِ پريس بريفنگ دوران جي ڊي وينس پاڪستان جي وزيراعظم شهباز شريف ۽ فيلڊ مارشل عاصم منير جو شڪريو ادا ڪيو. هن چيو ته پاڪستاني قيادت ڳالهين کي ڪامياب بڻائڻ لاءِ اهم ڪردار ادا ڪيو ۽ ٻنهي ملڪن وچ ۾ اختلاف گهٽائڻ لاءِ سنجيده ڪوششون ڪيون.
هن وڌيڪ چيو ته ڳالهين ۾ جيڪا به ڪمي رهي، ان جو ذميوار پاڪستان نه آهي، ڇو ته پاڪستان مڪمل ايمانداري سان ثالثي جو ڪردار ادا ڪيو. سندس چوڻ هو ته پاڪستان آمريڪا ۽ ايران جي وچ ۾ فاصلا گهٽ ڪرڻ لاءِ بهترين ڪم ڪيو ۽ ڪنهن به ممڪن معاهدي تائين پهچڻ لاءِ ڀرپور مدد ڪئي.
جي ڊي وينس جو چوڻ هو ته هاڻي ڏسڻو پوندو ته ايران آمريڪا جي پيش ڪيل آفر تي مستقبل ۾ ڪهڙو ردعمل ڏي ٿو. هن اميد ظاهر ڪئي ته سفارتي ڪوششون جاري رهنديون ۽ ڪنهن نه ڪنهن مرحلي تي ٻنهي ڌرين وچ ۾ اڳڀرائي ضرور ٿيندي.
هن بيان مان ظاهر ٿئي ٿو ته جيتوڻيڪ ڳالهين دوران ڪجهه اڳڀرائي ٿي، پر اهم معاملن تي اختلاف برقرار آهن، جنهن سبب حتمي معاهدو ممڪن نه ٿي سگهيو. بهرحال، پاڪستان جي ثالثي ڪردار کي ٻنهي ڌرين طرفان ساراهيو ويو، جيڪو علائقي ۾ امن لاءِ هڪ مثبت قدم سمجهيو پيو وڃي۔
