سعودي عرب پاران گوادر ۾ وڏي آئل ريفائنري قائم ڪرڻ لاءِ لڳ ڀڳ 10 ارب ڊالر جي وڏي سيڙپڪاري جو امڪان ظاهر ڪيو ويو آهي، جيڪو پاڪستان جي توانائي شعبي لاءِ هڪ اهم پيش رفت سمجهي پئي وڃي.
ذريعن موجب سعودي ڪمپني آرامڪو پاڪستاني ڪمپنين سان گڏجي هن ريفائنري منصوبي تي ڪم ڪرڻ جي رٿابندي ڪري رهي آهي. پاڪستاني ڪمپنين ۾ پي ايس او (PSO)، او جي ڊي سي ايل (OGDCL)، پي پي ايل (PPL) ۽ جي ايڇ پي ايل (GHPL) شامل آهن، جيڪي گڏيل طور تي منصوبي ۾ 40 کان 45 سيڪڙو تائين حصيداري ڪري سگهن ٿيون.
هن مجوزه آئل ريفائنري جي روزاني پيداوار جي صلاحيت لڳ ڀڳ 4 لک بيرل تائين ٿيڻ جو امڪان آهي، جيڪا ملڪ ۾ پيٽروليم شين جي فراهمي کي بهتر بڻائڻ ۾ اهم ڪردار ادا ڪري سگهي ٿي. اهڙي وڏي پيماني جي منصوبي سان نه رڳو توانائي جي ضرورتن کي پورو ڪرڻ ۾ مدد ملندي، پر درآمدي تيل تي دارومدار به گهٽجي سگهي ٿو.
ذريعن اهو به ٻڌايو آهي ته حڪومت هن منصوبي کي هٿي ڏيڻ لاءِ 20 سالن تائين ٽيڪس ۾ ڇوٽ ڏيڻ جي تجويز تي غور ڪري رهي آهي، جنهن سان سيڙپڪارن لاءِ وڌيڪ سازگار ماحول پيدا ٿيندو.
ماهرن موجب، جيڪڏهن هي منصوبو عملي صورت اختيار ڪري ٿو ته اهو گوادر جي ترقي، روزگار جي موقعن ۽ پاڪستان جي مجموعي معيشت لاءِ انتهائي فائديمند ثابت ٿيندو، ۽ ملڪ کي توانائي جي شعبي ۾ وڌيڪ خودڪفيل بڻائڻ ۾ مدد ڏيندو۔
