شاعر مشرق علامه محمد اقبال جي فڪر محڪوم قوم کي بيداري، خوداعتمادي ۽ مسلسل جدوجهد جو شعور عطا ڪيو : وزيراعظم

وزيراعظم محمد شهباز شريف مفڪر اسلام، شاعر مشرق ۽ مصور پاڪستان علامه محمد اقبال رحمته الله کي خراج عقيدت پيش ڪندي چيو آهي ته سندس فڪر هڪ محڪوم قوم کي بيداري، خوداعتمادي ۽ مسلسل جدوجهد جو شعور عطا ڪيو، اڄ جي قومي ۽ عالمي حالتن ۾ سندس پيغام اسان جي لاءِ غيرمعمولي اهميت رکي ٿو. اقبال ڏهاڙي تي پنهنجي پيغام ۾ وزيراعظم چيو ته هو پوري قوم پاران علامه محمد اقبال رحمته الله کي دلي خراج عقيدت پيش ڪري ٿو. وزيراعظم آفيس جي ميديا ونگ پاران جاري بيان موجب وزيراعظم چيو ته بنا ڪنهن شڪ جي علامه اقبال ننڍي کنڊ جي مسلمانن جو محسن ۽ عظيم فڪري اڳواڻ هو، علامه اقبال خودي، عمل، ايمان ۽ فڪري آزادي جو پيغام ڏنو، علامه اقبال جي فڪر هڪ محڪوم قوم کي بيداري، خوداعتمادي ۽ مسلسل جدوجهد جو شعور عطا ڪيو. هن چيو ته اڄ جي قومي ۽ عالمي حالتن ۾ علامه اقبال جو پيغام اسان جي لاءِ غيرمعمولي اهميت رکي ٿو. فڪري انتشار، انتهاپسندي، معاشرتي عدم برداشت ان ڳالهه جا گهرجائو آهن ته اسان پنهنجي انفرادي ۽ اجتماعي زندگي کي علامه اقبال جي فڪري تربيت جي روشني ۾ قائم ڪريون، علامه اقبال محبت، اخوت ۽ ملت جي بيداري کي زندگي جو مقصد قرار ڏنو. وزيراعظم چيو ته علامه اقبال جي نظرين جي روشني ۾ پرامن، اتحاد، علم، ڪردار ۽ انصاف جي مضبوط بنيادن تي قائم پاڪستان ئي اسان جو مستقبل آهي. هن چيو ته پاڪستان حڪومت دهشتگردي، انتهاپسندي ۽ فرقيواريت جي مڪمل خاتمي ۽ هڪ معتدل ۽ هم آهنگ معاشرو قائم ڪرڻ جي لاءِ پرعزم آهي. وزيراعظم  ياد ڏياريو ته علامه اقبال جو نوجوان نسل جي تربيت تي خاص ڌيان هو، هن نوجوانن کي ملت جو سرمايو ۽ مستقبل جو معمار قرار ڏنو، نئين نوجوان نسل کي علم، هنر، ڪردار، خودداري ۽ حب الوطني سان ليس ڪرڻ قومي مستقبل جي لاءِ لازمي آهي. هن چيو ته حڪومت ان ڳالهه تي يقين رکي ٿي ته تعليم کي فڪري، اخلاقي ۽ قومي بنيادن تي قائم ڪرڻ کانسواءِ قومي ترقي جو خواب مڪمل نه ٿو ٿي سگهي، انهي نظريي تحت نوجوانن کي بااختيار بڻائڻ، انهن کي جديد مهارتن سان هم آهنگ ڪرڻ ۽ قومي ترقي ۾ انهن جي ڪردار کي مضبوط بڻائڻ جي لاءِ ضروري قدم کنيا پيا وڃن. وزيراعظم چيو ته پاڪستان جا نوجوان جيڪڏهن اقبال جي فڪر مان رهنمائي حاصل ڪن ته اهي ملڪ کي ترقي ۽ استحڪام ۽ وقار جي نئين منزلن سان همڪنار ڪري سگهن ٿا، نوجوانن سان گڏ پوري قوم جي لاءِ به علامه اقبال اميد ۽ مسلسل اڳتي وڌڻ جو درس ڏنو جيڪو اسان جي قومي امنگن جي ترجماني ڪري ٿو. هن چيو ته اقبال ڏهاڙي جي موقعي تي اچو اهو وچن ڪريون ته اقبال جي فڪر کي پنهنجي قومي پاليسي، تعليمي ترجيحن ۽ گڏيل طرز فڪر جو حصو بڻائينداسين ۽ اهڙي پاڪستان جي تعمير جي لاءِ ڪم ڪريون جيڪو هڪ شاندار مستقبل جو ضامن هجي، انشاءَ الله.