حڪومت قدرتي زميني وسيلن، نباتات ۽ ماحول جي تحفظ ۽ موسمياتي تبديلي کي روڪڻ جي لاءِ قابل تجديد توانائي جي فروغ سميت ڪيترائي قدم کڻي رهي آهي: وزيراعظم شهباز شريف جو زمين جي عالمي ڏهاڙي تي پيغام

وزيراعظم محمد شهباز شريف زمين ۽ ان جي ماحول جي تحفظ جي لاءِ عالمي سطح تي موثر عالمي تعاون ۽ گڏيل حڪمت عملي کي لازمي قرار ڏيندي چيو آهي ته پاڪستان حڪومت قدرتي زميني وسيلن، نباتات ۽ ماحول جي تحفظ ۽ موسمياتي تبديلي کي روڪڻ جي لاءِ قابل تجديد توانائي جي فروغ سميت ڪيترائي قدم کڻي رهي آهي. اڄ (اربع) تي ملهائجندڙ زمين جي عالمي ڏهاڙي جي جي موقعي تي پنهنجي پيغام ۾ وزيراعظم محمد شهباز شريف چيو ته پاڪستان اڄ ڀرپور ۽ پرعزم انداز ۾ زمين جو عالمي ڏهاڙو ملهائي رهيو آهي، هي ڏينهن زمين جي لازمي اهميت کي اجاگر ڪري ٿو ۽ ان جي تحفظ جي گڏيل ذميواري جو احساس پڻ ڏياري ٿو. وزيراعظم آفيس جي ميڊيا ونگ پاران جاري بيان موجب وزيراعظم چيو ته زمين جا قدرتي وسيلا انساني زندگي جي موجودگي ۽ واڌويجهه جي ضمانت آهن، اڄ دنيا کي موسمياتي تبديلي سميت مختلف ماحولياتي چئلينجز درپيش آهن جيڪي ان جي قيمتي قدرتي وسيلن، موسمياتي تبديلين ۽ زندگي جي معار تي اثر وجهي رهيا آهن. هن چيو ته پاڪستان موسمياتي تبديلي جي متاثرين ۾ نمايان آهي، اها صورتحال زمين جي قدرتي ڍانچي جي تحفظ جي عزم کي اڃا وڌيڪ پختو ڪري ٿي، موسمياتي شدت ۽ غيرمعمولي تبديليون زمين جي ماحولياتي تبديلي جي عڪاس آهن. هن چيو ته پاڪستان حڪومت زمين جي قدرتي وسيلن، نباتات ۽ ماحول جي تحفظ ۽ موسمياتي تبديلي سان مقابلو ڪرڻ جي لاءِ ٻين قدمن سميت قابل تجديد توانائي جي فروغ جي لاءِ ڪوششون ڪري رهي آهي، ان ڏس ۾ عوامي آگاهي پڻ انتهائي اهم آهي ته جيئن زمين جي تحفظ ۾ انفرادي ۽ گڏيل ذميواريون موثر انداز ۾ ادا ڪري سگهجن، وڌيڪ اهو ته عالمي سطح تي موثر عالمي تعاون ۽ ماحول جي تحفظ سان هم آهنگ گڏيل حڪمت عملي لازمي آهي. هن چيو ته اچو اڄ انفرادي ۽ گڏيل طور تي عزم جو ورجاءُ ڪريون ته ماحولياتي تحفظ ۽ زمين جي سارسنڀال جي لاءِ هر ممڪن فرض ادا ڪريون ته جيئن نئين نسل جي لاءِ صحتمند ماحول کي يقيني بڻائي سگهجي، اها ئي خوشحالي جي ضمانت آهي.