متحده عرب امارات (يو اي اي) اعلان ڪيو آهي ته ملڪ ۾ فضائي آپريشن ٻيهر مڪمل طور تي معمول تي بحال ڪيو ويو آهي۔
خليجي ميڊيا رپورٽن موجب يو اي اي جي جنرل سول اي ويئيشن اٿارٽي ٻڌايو آهي ته ملڪ جي فضائي حدن ۾ هوائي آمدورفت هاڻي عام روٽين مطابق جاري آهي، جڏهن ته عارضي طور تي لاڳو ڪيل احتياطي قدم به ختم ڪيا ويا آهن۔
اٿارٽي جو چوڻ آهي ته موجوده صورتحال جو جائزو وٺڻ کانپوءِ فضائي آپريشن بحال ڪرڻ جو فيصلو ڪيو ويو، جنهن سان هوائي سفر ڪندڙ مسافرن کي وڏي رليف مليو آهي۔
جنرل سول اي ويئيشن اٿارٽي وڌيڪ چيو آهي ته فضائي تحفظ کي يقيني بڻائڻ لاءِ جديد نظام تحت مسلسل ۽ بروقت نگراني جاري رکي ويندي ته جيئن ڪنهن به هنگامي صورتحال کي فوري طور سنڀالي سگهجي۔
اٿارٽي عوام کي هدايت ڪئي آهي ته هو ڪنهن به قسم جي معلومات لاءِ صرف سرڪاري ذريعن تي ڀروسو ڪن ۽ غير تصديق ٿيل خبرن کان پاسو ڪن۔
واضح رهي ته يو اي اي عالمي هوائي آمدورفت جو اهم مرڪز آهي، جتي روزانو هزارين مسافر اچ وڃ ڪندا آهن، تنهن ڪري فضائي آپريشن جي بحالي سان بين الاقوامي سفر ۽ ڪاروباري سرگرمين ۾ به بهتري ايندي۔
