آسٽريليا ۾ چوهن جي وڏي تعداد سبب زرعي فصلن کي شديد نقصان پهچڻ جا خدشا پيدا ٿي ويا آهن، جنهن سان ملڪ ۾ خوراڪ جي سپلاءِ به متاثر ٿي سگهي ٿي۔
غير ملڪي ميڊيا موجب آسٽريليا جي حڪومت خاص طور تي ملڪ جي اولهه وارن زرعي علائقن ۾ چوهن جي وڌندڙ آبادي سبب پريشان آهي۔ اهي چوهه اناج جي فصلن تي حملو ڪري رهيا آهن ۽ تيزي سان فصلن کي تباهه ڪري رهيا آهن، جنهن سان هارين کي وڏو نقصان ٿي رهيو آهي۔
رپورٽن مطابق چوهن جو مسئلو آسٽريليا جي اناج پيدا ڪندڙ علائقن لاءِ هڪ مستقل چيلنج بڻجي چڪو آهي، جتي هر سال فصلن جي پيداوار متاثر ٿيڻ جا واقعا سامهون اچن ٿا۔
ماهرن جو چوڻ آهي ته جيڪڏهن هن صورتحال تي فوري ضابطو نه آندو ويو ته ملڪ ۾ خوراڪ جي فراهمي جو نظام به دٻاءَ هيٺ اچي سگهي ٿو، جنهن جا اثر مقامي منڊي ۽ برآمدات تي به پئجي سگهن ٿا۔
حڪومتي سطح تي چوهن جي خاتمي لاءِ مختلف قدمن تي غور ڪيو پيو وڃي، جڏهن ته هارين کي به احتياطي تدبيرون اختيار ڪرڻ جي هدايت ڪئي وئي آهي ته جيئن نقصان کي گهٽائي سگهجي۔
