ڪراچي: شهر ۾ گرمي جي شدت وڌڻ لڳي آهي، جتي اڄ وڌ ۾ وڌ گرمي پد 38.5 ڊگري سينٽي گريڊ رڪارڊ ڪيو ويو آهي۔ موسميات کاتي وڌيڪ گرمي جي اڳڪٿي ڪئي آهي، جنهن سبب شهرين کي احتياط ڪرڻ جي هدايت ڪئي وئي آهي۔
موسميات کاتي موجب ايندڙ 24 ڪلاڪن دوران ڪراچي ۾ موسم گرم ۽ خشڪ رهندو، جڏهن ته ڏينهن جي وقت آسمان صاف رهڻ جو امڪان آهي۔ شهر ۾ وقفي وقفي سان تيز هوائون به هلڻ جي اڳڪٿي ڪئي وئي آهي۔
موسميات کاتي خبردار ڪيو آهي ته گرمي جي شدت ۾ وڌيڪ اضافو ٿيندو۔ آچر تي گرمي پد 40 ڊگري ۽ سومر تي 41 ڊگري سينٽي گريڊ تائين پهچي سگهي ٿو، جنهن سان هيٽ ويو جهڙي صورتحال پيدا ٿي سگهي ٿي۔
ٻئي پاسي سنڌ جي ڪيترن ئي ضلعن ۾ به سخت گرمي جاري آهي، جتي موسم گرم، شديد گرم ۽ خشڪ رهڻ جو امڪان ظاهر ڪيو ويو آهي۔ جامشورو، دادو، شهيد بينظير آباد، گھوٽڪي ۽ سانگهڙ سميت ڪيترن علائقن ۾ گرمي معمول کان 4 کان 6 ڊگري وڌيڪ رهڻ جي اڳڪٿي ڪئي وئي آهي۔
موسميات کاتي موجب 3 مئي تائين سنڌ جي وچولي ۽ اترين علائقن ۾ هيٽ ويو جاري رهڻ جو امڪان آهي، جڏهن ته ڪجهه علائقن ۾ گرد آلود هوائون ۽ هلڪي برسات به ٿي سگهي ٿي۔
ماهرن جو چوڻ آهي ته مغربي هوائن جي نظام سبب ڪجهه وقت لاءِ گرمي ۾ ٿوري گهٽتائي اچي سگهي ٿي، پر 5 مئي کان پوءِ گرمي ٻيهر وڌڻ جو خدشو موجود آهي۔
اختيارين شهرين کي صلاح ڏني آهي ته هو سخت گرمي دوران غير ضروري ٻاهر نڪرڻ کان پاسو ڪن، پاڻي جو استعمال وڌائين ۽ پاڻ کي سج جي تپش کان بچائين۔
